Новости
Күнү-дьылы баттаhа үлэ күүскэ барар. В Оленёкском районе предприниматели готовятся к отопительному сезону
2 сентября 2016

Бу күннэргэ күнү-дьылы былдьаhан олохтоохторго илиҥҥи олорор тэрилтэлэр үлэ үөһүгэр  сылдьаллар. Куораттары уонна бөһүөлэктэри тупсарыы сыла биллэриллибитинэн УК «Инкит» күүстээх үлэни ыыта сылдьаллар. Үлэ киһитэ хаһан баҕарар түбүгүрэ, ыксыы сылдьар буолар.  Салайааччы Павел Егорович Типяновы көрсөн «Сардаҥа» хаһыат ааҕааччыларыгар анаан сайыҥҥы үлэлэр хайдах бара туралларын туһунан ыйыталастым.

— Павел Егорович, кэпсэтиибитин үлэ-хамнас хайдах баран иһэриттэн саҕалыахха, бу күннээҕи туругунан тэрилтэҕит кэлэр кыстыкка бэлэмнэнии үлэтин хайдах тэринэн үлэлии сылдьаргытын билиһиннэр эрэ.

— Быйылгы кыстыкка бэлэмнэнии үлэтэ былаан быһыытынан бара турар. Ол курдук, больничнай комплекска 2 оһох киирдэ, итиэннэ трассаны уларыттыбыт. Икки емкостька спутник оҥоро сылдьабыт, итинник спутник тымныы кэмҥэ нефть хараллан турар емкоһын сылытар аналлаах. Авиационнайга биир оһох туруордубут, ону тэҥэ ыалларга трасса оҥоттордубут. Котельнайга күрүө оҥордубут, билигин тэлгэһэтин ааннарын оҥоруохпут. Котельнай иһигэр уот киллэрдибит, саҥаттан. Билигин хомуйа сылдьабыт, барыта бүттэҕинэ горелкаларбытын бэрэбиэркэлиэхпит, ол барыта сатаннаҕына күһүн ууну ыытан киирэн барыахпыт. Бу ый бүтүүтэ атырдьах ыйын 23- 24 күннэригэр уу ыытан кэтээн көрүөхпүт. Портка барыта бүтэн бэлэм, онно оҕо тэрилтэтэ баар, хаһан баҕарар холбонорго бэлэм. Оператордар үлэлиир сирдэринэн дьуһуурунай  хосторун оҥосто сылдьаллар.

— Улахан  туох үлэ барда?

— Больничнай комплекска суол оҥордубут, плетняк, гравий, куттардыбыт, онтубутун барытын тэҥнээн биэрдибит. Онно эмиэ күрүө, ворота оҥоһуллуоҕа.  Урут эрдэ холбоммут ыаллары көннөрөн саҥа тардыбыт трассабытыгар көһөрөн биэрдибит тоҕо диэтэххэ, итинэн саҥа суол оҥоһулунна. Портка эмиэ икки оһох турда. Сайыҥҥы үлэлэргэ дуогабарынан дьону үлэлэттибит, тэрилтэбит үлэһиттэрэ уоппускаттан үлэлэригэр саҥа таҕыстылар.

— Саамай тыын боппуруоспут оттук тиэллэн кэлиитэ буолар, эһиэхэ билиҥҥи туругунан  саппааскытыгар төһө оттук  баарый?

— Сөп буолар нефть кэлэн турар, ахсынньыга дылы тиийиэҕэ диэн суоттанан олоробут, алтынньы – сэтинньи ыйдар бүтүөхтэригэр диэри неби оттуохпут оттон улахан тымныыларга  конденсакка көһөрүөхпүт.

— Сорох тэрилтэлэр үлэһиттэригэр хамнастарын уһуннук төлөөбөккө тутар түгэннэрэ баар буолар, эһиэхэ ити чааһыгар хайдаҕый?

— Хамнаска иэспит суох, үлэһиттэрбитигэр барытын кэмигэр төлөөн олоробут.

— Чааһынай ыаллар сылааска холбоноллоругар сайаапка биэрэллэр, онтон уочараты төһө өр күүтэллэрий?

— Чааһынай ыаллар сайаапканы биир сыл иннинэ биэриэхтэрин наада, тоҕо диэтэххэ турбалары, атын саппаас чаастары сакаастаан аҕалтарарга биһиги суоттанарбытыгар табыгастаах буоллун диэн. Чааһынай ыалларга киллэрэбит, быйыл түөрт ыалга холбонно, үс ыалга эппитим курдук матырыйаалбыт татым буолан киирбэтэ. Эһиилгигэ киирэргэ диэн тураллар. Сорох ыаллар сайаапка биэрэллэр уонна судургу киирэр курдук саныыллар, оннук буолбатах, ханан киирэрэ, трассаҕа чугаһа барыта үөрэтиллэр, ол кэнниттэн биирдэ киллэрэбит, төһө турба, матырыйаал барарын ааҕынарбытыгар эрдэттэн дьаһаныахтарын наада.

Бу күннэргэ трассалары бүрүйүү үлэтэ барыаҕа, итиннэ бары тахсыахпыт биир нэдиэлэ курдук үлэлиэхпит. Билигин үлэбит сүрүнэ диэн ууну ыытан трассалары кэтээн көрүү буолуоҕа, ханна тэстэр, быыґылыыр сирдэри кэрийэн көрөн, бэлиэтээн судургу туоратар үлэни ыытар сыаллаахпыт, оҥоһулларын оҥорон бүтэриэхпит, билигин эрэ сатанар итинник үлэ. Кыһын саахал тахсыбатын курдук дьаһанабыт. Кыһын трассанан уу  тэстэрин туоратыы ыарахаттардаах буолааччы.

Улахан, ыарахан матырыйаалларбытын, холобур оһохтору эҥин атыылаһан ыларбытыгар, тиэйтэрэн аҕалтарарбытыгар улуус администрацията көмөлөһөр.

— Тэрилтэҕитигэр бастыҥ үлэһиттэринэн кимнээҕи ааттыаххытын сөбүй?

— Тэрилтэбитигэр барыта олохтоох кадрдар үлэлииллэр, сорохторо күтүөт  дьоннор.  Өр үлэлээбиттэртэн Убояков Николай, Шарин Виктор, Павлов Петр  Петрович, Ушманов Василий Эдуардович, Николаев Юрий буолаллар, эдэр уолаттар Кириллин Василий, Корякин Дмитрий онтон да атыттар буолаллар. Быйыл үксүтэ  эдэр уолаттар үлэлии киирдилэр. Бу күннэргэ үлэлээбит сирдэрбитин барытын ыраастаан, хомунан  бүтэриэхпит.

— Павел Егорович, үлэҕиттэн быыс булан боппуруостарбар эппиэттээбиккэр махтал буоллун, кыстыгы үчүгэй бэлэмнээх көрсөргүтүгэр уонна  салайар тэрилтэҥ үлэтэ өрүү  таһаарыылаах буоллун!

Кыстыкка бэлэмнэнии былааннаммыт кэмигэр бүтэрин туһугар эдэр салайааччы Павел Егорович үлэ үөһүгэр сылдьар, үлэһиттэр сайыҥҥы сынньалаҥ уоппускаларыттан кэлэн көхтөөхтүк үлэлии сылдьаллар, «Инкит» тэрилтэ үлэһиттэрэ үксүлэрэ эдэр дьоннор эбит. Бу буолар дьон олорор, үлэлиир дьиэлэрин  сылааһынан хааччыйыы саамай наадалаах тыын боппуруос буоларын өйдөөн, эдэр үлэһит уолаттар турунан туран үлэлии-хамсыы сылдьалларыттан үөрэбит, дьиэ сылааһыттан хас биирдиибит  олоҕо, доруобуйата улахан тутулуктаах, онон эдэр салайааччыларбытыгар инники үлэлэригэр ситиһиилэри баҕарыаххайыҥ!

 

Кэпсэттэ Надежда КОЛОДЕЗНИКОВА,                                               «Сардаҥа» хаһыат корр.

Ааптар хаартыскаҕа түһэриилэрэ.

Есть вопрос?
Позвони 8-800-100-58-80