×

Следите за новостями в Telegram-канале Центра «Мой бизнес» Якутии

Читать
Новости
Көтөргө сөп түбэһэр аһылыгы Григорьевтартан ылыахха сөп
10 июня 2022

Аммаҕа нэһилиэгэр түргэнник ситэр салааҕа ылсан үлэлии сылдьар Саргылана, Тимофей Григорьевтар үһүс сылларын көтөр арааһын иитэллэр. Онуоха аһылыктарын хааччыннахтарына эрэ көтөрдөрү дэлэччи иитиэххэ сөп эбит диэн санааттан Саха сирин тас өттүттэн удамыр сыанаҕа ылаллар, таарыйа олохтоох нэһилиэнньэҕэ эмиэ көмөлөһөллөр.

«Бу сылга нэһилиэнньэҕэ 400 куурусса, 200 индюгу, 100 куһу атыылаатыбыт, онон дьон көтөрү иитэр буолан эрэр диэн бэлиэтии көрөбүт. Бэйэбитигэр сөп буолары эмиэ тутабыт. Фабрикаттан субу тиэллэн кэлбит куурусса атын усулуобуйаҕа кэллэҕинэ биир — икки нэдиэлэ устата оннун булар. Хаһаайыттар табан аһаттахтарына сымыыты үчүгэйдик ылан барыахтара. Оттон хас биирдии фабрика сымыыттыылларын, улааталларын учуоттаан, аһылыгын рационун бэйэтэ сөбүлүүрүнэн оҥорор. Фабрикаҕа килиэккэлэргэ кыараҕастык туралларыттан дьоҥҥо түүлэрэ түспүт кууруссалар кэлэллэр. Маныаха түүлэрин үүннэрэр, сымыыттыылларыгар көмөлөһөр, сымыыттарын хаҕын бөҕөргөтөр араас битэмииннэр, минераллар элбэхтэр, аһа иҥэмтиэлээх буоларыгар ракушканы, гравийы, кумаҕы булкуйан биэрэр эмиэ туһалаах. Маны билэр дьон биһигиттэн кэлэннэр эт, бурдук, соя састааптаах бурдуктары, шрот, жмых курдук араас эбии аһылыктары ыланнар олус туһаналлар. Улууспут олохтоохторун таһынан Уус Маайаттан, Чурапчыттан кытта кэлэн ылаллар. Көтөр аһылыктарын Благовещенскайтан, Новосибирскайтан удамыр сыанаҕа ылабыт, дьоҥҥо атыылыырбытыгар элбэҕи эппэппит.

Сорох дьон кууруссаҕа ас тобоҕун булкуйан биэрэллэр, ону чаас аҥаарынан сиэн бүтэриэхтэрин наада. Куурусса сымыыттыырын курдук бэйэтигэр сөптөөх булкаас аһылыгынан (комбикорм) аһатар сөп. Олус уойдаҕына эмиэ сымыыттаабат буолар. Сууккаҕа холбоон 120 грамы аһыахтаах, уу, кумах, гравий куруук баар буолуохтаах, сибиэһэй балыгы, Аммабыт туораахтаах бурдугун эбиэһи, нэчимиэни эбиэххэ сөп. Маны таһынан миэли, кальцийы, сымыыт хаҕын мэлийиэн эмиэ бэриллэр. Куурусса анал бурдуга толору битэмииннээх, минераллаах буолан атын аһылык ирдэммэт. Биһиэхэ сымыыттыыр кууруссаҕа, эт кууруссаҕа, индюкка, хааска, куска, чоппуускаҕа, козаҕа, барааҥҥа, ынах сүөһүгэ, сибиинньэҕэ, бэл ыкка аналлаах бары састааптаабынан толору, баай аһылык араас көрүҥэ баар. Ылыан баҕалаахтар 79990602674 төлөпүөн нүөмэринэн билсиэхтэрин сөп», — диэн этэллэр Саргылана, Тимофей Григорьевтар.

Источник