Кэбээйи нэһилиэгэр пластик-полипропилен матырыйаалтан емкостары оҥорор «Пластекс» тэрилтэттэн кэлэннэр үлэлээн эрэллэр.

Бу тэрилтэ 2011 сылтан тэриллэн, үлэлээн-хамсаан баалларын биллэрэн кэллилэр. Ол курдук Саха сирин улуустарынан кэрийэ сылдьан олоххо олус туһалаах уонна наадалаах араас кээмэйдээх емкостары, тыылары, оҥочолору, хаары соһор салааскалары, бассейыннары оҥорон саха дьонун олоҕун аныгылыы мээрэйгэ тэҥнээн эрэллэр.

Бу туһунан тэрилтэ сүрүн маастара Григорий Пахомов бу курдук сырдатта:

«Биһиги тэрилтэбит сайаапка хомуйаммыт сакаасчыт биэрбит мээрэйинэн матырыйаалбытын быһан бэлэмниибит, миэстэтигэр тиэйэн аҕалан таҥаммыт сакаасчыкка дьиэтигэр илдьэн биэрэбит. Матырыйаалбыт пластик-полипропилен диэн, сертификаттаах, доруобуйаҕа буортута суох. Бүгүн Кэбээйигэ кэлэммит үлэлии сылдьабыт. Сакаас биэрээччилэр кэлэ тураллар. Онон үлэ-хамнас тэтимэ үчүгэй. Бу сырыыбытыгар 40-ча сайаапкаҕа сакааһы толорордуу бэлэмнээх кэллибит. Бастакы сырыыбытыгар чааһынай ыаллар муус хаһаанарга емкость сакаастаатылар уонна тыы, оҥочо сакаастара бааллар».

Григорий кэпсииринэн, сакаасчыт эппит мээрэйинэн сакааһы оҥоруу бу тэрилтэҕэ 2014 сылтан үлэлиир буолбут. Чурапчы, Ленскэй, Үөһээ Бүлүү улуустарыгар кэккэ сылларга улахан сакаастары толорон, 100, 1500 кубтаах емкостары тэрилтэлэргэ туруоран балачча үлэлээн кэлбиттэр. Билиҥҥи туругунан тэрилтэҕэ сэмэлээһин, хомуруйуу киирэ илик эбит. Онон сылыктаатахха, үлэ да, матырыйаал да хаачыстыбалара үчүгэйин мэктиэлиир.

Текст: Татьяна Максимова-Лазарева
Источник: ЭСМИ «Ulus.media»