Новости
Кэрэ тырымныы тыллар студията
19 марта 2020

Саҥа үйэҕэ саҥа саҕахтар, саҥа көрүүлэр … Бириэмэ хардыытын кытта Кэрэ Куо, дьахтар сааһыттан тутулуга суох, бэйэтин билиниитэ, билиҥҥи кэмҥэ олоҕу кытта тэҥҥэ сайдара, аныгы кэм култуурата, ирдэбилэ. Сандал саас кэрэ күнүн көрсө, Наммыт киинигэр Аан дойду дьахталларын күнүн көрсө «Преображение» проект икки нэдиэлэ буолан ааста. Саҥа үйэ сүүрээнигэр, хас биирдии кэрэ Куо тэҥҥэ хардыылаан, тас көрүҥүн көрүнэр, ис санаатын күүһүрдэн бу олоххо бэйэтин булунарыгар аналлаах уонна саҥа клиеннары интириэһиргэтэн тардар сыаллаах проект. Проегы «Ко-Ко» кырасыабай буолуу (красота) студия салайааччыта Екатерина Игнатьева уонна сертифицированнай массажист Олеся Алексеева тэрийдилэр. Тоҕо «Ко-Ко»? Аатырбыт Габриэль Бонёр Шанель (Ко Ко Шанель) французкай модельер икона стиля. Дьахтар таҥаһын атын таһымҥа уларытан таһаарбыт дьахтар буолар. Числовой нумерологиянан суоттанан, үлэҕэ-хамнаска барсыахтаах диэн «Ко-Ко» аат талыллыбыт.

Проекка араас идэлээх, араас саастаах кэрэ аҥаардар кытыннылар. Проект төлөбурдээх, проегы тэрийээччилэр акция оҥорон улахан чэпчэтиилээх подарок оҥордулар. Проекка эти-сиини массажтааһын, хиромассаж, шеллак, сирэйи ыраастааһын, парикмакер баттах кырыйыыта, кырааскалааһына, прическа оҥоруута, кыламан оҥоруу, макияж, психологическай тренинг, бөлөҕүнэн кэрэни кэрэһэлиир дьарык өҥө киирдэ. Бу маны барытын иккиэн тэрийдилэр. Проект хаартыскаҕа түһүүннэн түмүктэннэ. Бэйэ-бэйэбитин кытта чугастык билистибит. Хас биирдии кыттааччы санаалыын сырдаан, сир үрдүгэр кэрэ Куо, буолан төрөөбүт аналыттан үөрэн тарҕастыбыт. Екатерина Степановна проегы сэргээбит Далбар Хотуттарга, бииргэ үлэлэспит, күүс-көмө буолбут, бииргэ үлэлиир Олеся Алексееваҕа уонна Сардаана Петроваҕа махталын биллэрэр.

Тус бэйэм элбэҕи билэн, сайдан бу проекка сылдьыбыппыттын астынным. Бу проегы тэрийбит кыргыттар «Туйаара» магазин иккис этээһигэр, икки хоһу арендалаабыттар.

Биир хоско араас моделлаах, бэйэ-бэйэтигэр майгыннаспат, аҕыйах ахсаанынан, чэпчэки сыаналаах күн эгэлгэ таҥас атыыланар. Табаар сотору-сотору кэлэн, утары бүтэр эбит. Хаһаайка Екатерина Игнатьева омук анала буолан, 21 сыл анараа өттүгэр,  Аппааныга Хатыҥ-Арыы нэһилиэгэр Игнатьевтар дьиэ кэргэн улахан уолларыгар кэргэн тахсан кэлбит. Идэтинэн педагог, бастаан детсадка 13 психологынан, воспитателынан үлэлээбит. Үлэлии сылдьан, кэрэ аҥардары мөссүөннэрин тупсарар сөбөлүүр дьарыктаах эбит. «Ону тоҕо дьарык тэриммэккин»,- диэн ыйытыыларын, «Бэйэҕэр наһаа барсыа»,- диэн этиилэрин ылынан студия тэрийбит. Бастаан тыҥырах, кыламан, макияж, баттах оҥорор визажистаах, түөрт кыыс маастардаах саҕалаабыт. Ол үлэлии сылдьан, студия иһинэн кыыс оҕо модельнай «Кэрэ Куо» студия тэрийэн үлэлэппит. Студияҕа 12-15 саастаах кыргыттар дьарыктанан улуус таһымыгар күрэххэ кыттан «Гран-При» үрдүк ситиһиилэммиттэр. Былырыын «Красота «Грация» бастакы проегын оҥорбут. Түмүгэр талааннаах дьону мунньан «Праздник красоты» концерт оҥорбут. Кыргыттар бэйэлэрин дьоҕурдарын арынан, суолларын булуммуттар. Билигин Олеся Алексеевалыын бииргэ үлэлиир. Кыргыттар иккиэн араас талааннара, дьоҕурдара бэйэ-бэйэлэрин толорсон биэрэллэр.

Иккис хоско массаж эгэлгэтин Олеся Алексеева оҥорор. Кыламан да олордор. Олеся массаж оҥороро ураты, чахчы идэтин баһылаабыт массажист. Холобур шейно-грудной массаж оҥороругар көхсүгүттэн саҕалаан сүнньүгүн, сиһин тоноҕоһун устун массажтыыр, түмүгэр өттүккүн, бууккун барыта сибээстээх диэн массажтыыр. Онтон сирэйгин массажтатарга сыҥааҕын анныттан саҕалаан, сирэйгин, моонньугун, кулгааххын, илиигин кытта массажтыыр. Бэйэтэ ис дууһатыттан, толору массаж оҥороро, эйэҕэс сыһыана киһини сынньатар, эмтиир-томтуур.

Ити курдук саҥаттан-саҥаны саҕан, айан-тутан дэгиттэр дьоҕурдаах, талааннаах кыргыттар тапталынан умсугутан, кэрэҕэ уһуйар кэрэхсэбиллэринэн угуттаан, уратыларынан абылаан олохпутун киэргэтэ, киэркэтэ сылдьаллар.

 

Источник: газета «Энсиэли»