Новости
Кыһалҕалаах кэмнэргэ биир бастакынан көмөҕө кэлэллэр
28 сентября 2021

Бүгүн, балаҕан ыйын 24 күнүгэр, улуус дьаһалтатын мунньахтыыр саалатыгар өрөспүүбүлүкэҕэ урбаанньыттар күннэрин көрсө баһылык солбуйааччыта Алгыс Стручков урбаанньыттары кытта “Төгүрүк остуолга” көрүстэ.

Урбаанньыттар улуус инники сайдыытын түстэһэр эрэ дьон буолбакка, араас үлэҕэ, кыһалҕалаах кэмнэргэ биир бастакынан көмөҕө кэлэр дьон буолар. Горнайга балаҕан ыйын 1 күнүнээҕи туругунан уопсайа 526 алын уонна дьоҕус урбаан субъега үлэлиир. Онно быһаччы үлэлиир дьон ахсаана 894, онтон үлэлэтэр дьоннорун ахсаана 2763 эбит. Улууска урбаан сүрүн хайысхатынан буолаллар:  атыы-эргиэн, тыа хаһаайыстыбата, тутуу, суолу көрүү-истии, придорожнай сервис, общепит, социальнай хайысхалаах өҥө оҥоруута, бурдук, кондитерскай үрүҥ, эт-үүт астар, тыа хаһаайыстыбатын боородууксуйата, иһэр ууну доставкалааһын, тутуу маһын оҥорон таһаарыы.

Бу өҥөлөртөн улуус бюджетыгар ааспыт сылга 13 120 000 солк. нолуок киирбит. Ити ааспыт сыллааҕар 12 %  элбэх эбит.

Улуус салалтата туризм хайысхатын сайыннарыыны биир сүрүн приоритет быһыытынан көрөр. Ол курдук, билиҥҥитэ улууска  Сиинэ пааркатын территориятыгар Петр Андреев, Вера Кесерова дьиэ кэргэттэринээн, Мытаахха Руслан Чемезов, Одунуга Алексей Максимов туристическай баазалара үлэлииллэр, саҥа тэриллибит Надежда Алексеева, Елизавета Агеева, Сардаана Никифорова биир күннээх туризм хайысхатын саҥалыы тобулан саҕалаатылар.

Биир киэн туттуубут, үүт уонна эт бородууксуйатын оҥорон таһаарар тэрилтэлэрбит “Горный-Ас” СХПК, “Горный мясопродукт” буолар. Нэһилиэнньэ кинилэр оҥорон таһаарар бородууксуйаларын урукку сылларга тэҥнээтэххэ олохтоох маҕаһыыннартан быстыбакка атыылаһар буолла. Бу тэрилтэлэр араас саҥа, сонун бородууксуйалары оҥорорго былааннаахтык үлэлииллэр. Бу күннэргэ Горный-Ас СХПК “Үрдэл” диэн саҥа сыыр бородууксуйаны презентациялаата.

Улууспутугар ыытыллыбыт Манчаары оонньууларын пуондатыгар көмө оҥорорго урбаанньыттар туора турбатылар. Кинилэр уопсайа  1 601 645 тыһ. солк. пуондаҕа киллэрэн, оонньуулар улууска үрдүк таһымнаахтык ыытылларыгар бэйэлэрин кылааттарын киллэристилэр.

Ону таһынан бу сайын улууспутугар буолбут улахан баһаардарга кинилэр көмөлөрө эмиэ үгүс. Бэс Күөлүгэр буолбут иэдээннээх баһаарга Бэрдьигэстээх урбаанньыттара харчынан 206 000 солкуобайы уонна аһынан-таҥаһынан, малынан-салынан, таһаҕас тиэйиитин өҥөтүнэн көмөлөрүн киллэристилэр. Онон бу күн норуот туһугар туора турбат ураты өҥөлөөх урбаанньыттарга улуус салалтата махтанан, өйдөбүнньүк бэлэхтэри туттарда.

Күндү урбаанньыттар идэлээх бырааһынньыккытынан итиитик-истиҥник эҕэрдэлиибит. Эһиги улуус сайдыытыгар киллэрсэр кылааккытын, күннэтэ сынньалаҥы умнан аһынан-таҥаһынан хааччыйар өҥөҕүтүн үрдүктүк сыаналыыбыт. Дойдуга төһө да ыарахан кэм турдар, нэһилиэнньэ күннээҕи олоҕор, кыһалҕаны билбэккэ этэҥҥэ олорорун иһин махтанабыт.

Хос бэлиэтээһин: эпидемиологическай хааччахтары тутуһан, бу көрсүһүүгэ Бэс Күөлгэ баһаарга көмөлөспүт урбаанньыттар эрэ ыҥырылыннылар.

Источник