Новости
МУОМАҔА УУНАН УСТУУГА БАСТАКЫ ТУРСЛЕТ БУОЛЛА
17 сентября 2018

Муома орто оскуолатын иһинэн үлэлиир «Айан» туристическай кулууп салайааччыта Андрей Громов, иитэр үлэҕэ директоры солбуйааччы Анна Слепцова тэрийиилэринэн, 5-11 кылаастарга «Юный водник» диэн уунан устууга бастакы туристическай слет буолан ааста. Слет Индигир өрүс боротуокатын Балаанса диэн сиригэр ыытылынна.

                                 

«Юный водник» диэн уунан устууга бастакы туристическай слет кэмигэр хас да түһүмэҕинэн куоҥкурустар буоллулар. Оҕолор катамаранынан, байдаарканан устууга, мэһэйдэри туорааһыҥҥа уонна ууга сылдьан сэрэхтээх буолуу плакатын ойуулааһыҥҥа куоталастылар. Биир катамараҥҥа 4 оҕо уонна икки улахан киһи олорон уһуннулар. Манна улахан дьонтон кылаас салайааччылара уонна төрөппүттэр кытыннылар.

Бу күрэхтэһиилэргэ кыайбыт уонна миэстэлэспит хамаандалар бочуотунай грамотанан уонна бирииһинэн наҕараадаланнылар.

Оҕолорго катамаранынан устууга олохтоох туризм энтузиастара Максим Захаров уонна Леонид Никулин көмөлөстүлэр. Ууга бастакы туристическай слет социальнай партнердарынан оройуоннааҕы ГИМС (инспектор Андрей Левченко) Муоматааҕы айылҕа паарката (директор Михаил Иванов), урбаанньыт Надежда Карпова, төрөппүттэр Николай Онопров, Семен Слепцов буоллулар.

Уунан сылдьыы бастакы слета үөрэнээччилэргэ уу туризмын пропагандалааһын, көҕүлээһин быһыытынан тэрилиннэ. Оҕолор ууга сэрэхтээхтик сылдьалларыгар олук уурда.

                      

Ааптар: Т. СЛЕПЦОВА