Муома улууһун Чыбааҕылаах нэһилиэгин баһылыга Г.И. Слепцов иһитиннэрбитинэн, нэһилиэккэ 170 туонна оттонуохтаах. Бүгүҥҥү туругунан ходуһаҕа икки хаһаайыстыба окко киирбит: сылгыны иитэр И.Е. Корякин уонна И.Г. Уваровскай үс киһилээх биригээдэтэ. И.Г. Уваровскай кэтэх хаһаайыстыбатын таһынан дьоҥҥо көмөлөһөр былааннаах.

Быйыл Чыбааҕылаах нэһилиэгэр от үүнүүтэ ортоһуор, сүөһүлээхтэр томторго оттууллар. Баһылык Г.И. Слепцов этэринэн, от ый иккис аҥарыгар үчүгэйдик ситиэҕэ. Чыбааҕылаахха сылгыны түөрт хаһаайыстыба иитэр: «Баалаан», «Төгүрүөн», «Алгыс» уонна «Корякин И.Е. ИП». Кинилэр холбоон 200-тэн тахса сылгылаахтар.

Индигир нэһилиэгин быйылгы былаанынан 338 туонна оттонуохтаах. Дьаһалта сири кытта үлэлээһиҥҥэ исписэлииһэ А.М. Хадаров: «Бүгүҥҥү күн туругунан нэһилиэккэ 12 киһи оттуур. «Победа» ТХПК-тан икки киһи, чааһынайдартан сэттэ, Соболоохтон А.И. Слепцов хаһаайыстыбатыгар үс отчут баар. Кинилэр түөрт-биэс туонна оту туруордулар. Бу күннэргэ агрооскуола отчуттара барыахтаахтар. Нэһилиэккэ мобильнай биригээдэни үлэлэтиэхпит. Сааһырбыт, кыаммат дьоҥҥо уонна резервэҕэ оттуохтара. От син үүннэ.

Улахан Чыыстай нэһилиэгин баһылыга П.М. Мараказов нэһилиэккэ 320 туонна былааннаахтарын билиһиннэрдэ. Тэрилтэлэр 163, бааһынай хаһаайыстыбалара 73, нэһилиэнньэ 14, оттон ынах сүөһүнү иитэр С.А. Данилова ИП 48 туоннаны оттуохтара. Окко киирии ый 12-15 күннэриттэн былааннанар. Сылгы иитиитинэн дьарыктанар «Чысхаан» ТХПК-ҕа үс биригээдэ оттуоҕа.

Төбүлэх нэһилиэгин сүрүннүүр исписэлииһэ П.В. Никифоров нэһилиэк 256 туоннаны оттуохтааҕын иһитиннэрдэ. Билигин «Уйгу» ТХПК-ҕа 11, А.Е. Николаев ИП-га биэс киһилээх биригээдэ үлэлиир. Кэтэх хаһаайыстыбалаах алта ыал ааспыт нэдиэлэттэн оттууллар. Иҥээлигэ Г.К. Старков, Б.И. Нучеканов хотуур суолун хааллардылар. От үүнүүтэ мөлтөһүөр, ол да буоллар дьон былааны толорор эрэллээхтэр. Төбүлэх нэһилиэгэ бүгүҥҥү туругунан 90 ынаҕы уонна 192 сылгыны иитэр.

 Туйаара Слепцова