Нам улууһугар Предприниматель күнүн көрсө ыытыллар тэрээһиннэр туһунан, Саха республикатын «Мой бизнес» киин Намнааҕы салаатын салайааччыта Марфа Тарабукина маннык кэпсээтэ:
– Балаҕан ыйын 21-25 күннэригэр бүтүн республика үрдүнэн Предприниматель күнүн бэлиэтээһиннэр саҕаланнылар. Ол чэрчитинэн, улууспутугар балаҕан ыйын 21 күнүттэн саҕалаан, оскуола оҕолоругар аналлаах «Бизнес – LAUNCH» диэн квест-оонньуу ыыттыбыт. Бу оонньуубут сүрүн сыала-соруга: бэйэ дьыалатын тэриниини киэҥник тарҕатыы уонна оҕолор предпринимателлэри кытта тус бэйэлэрэ билсэн-көрсөн, кэпсэтэн-ипсэтэн уопут ылыылара. Манна үс оскуолатааҕы бизнес инкубатортан барыта биэс хамаанда кытынна. Ол курдук, Аппааныттан – икки, Бастакы Хомустаахтан – икки уонна «Түөлбэ» оскуолатааҕы бизнес инкубатортан биир хамаанда.
Биһиги квест–оонньуубутугар Анисия Неустроева, «Фабрика предпринимательства Якутск» оҕолорго уонна улахан дьоҥҥо федеральнай үөрэҕирии бырайыагын организатора, кыттыыны ылла. Кини оҕолорго бэйэ сөбүлүүр дьарыгыттан идея оҥорон, сыал-сорук туруорунан, хайдах бэйэ дьыалатын тэринэн, эбии дохуот киллэринэр туһунан маастар-кылаас ыытта. Ону таһынан, улууспутугар үлэлии-хамныы сылдьар предпринимателлэри оҕолорбут төһө билэллэр эбитий диэн ыйытык оҥордубут.
Оонньуу бастакы күнүгэр, киэһэ 8 чааска оҕолор биһигиттэн сорудах ылбыттара уонна балаҕан ыйын 22 күнүгэр оҥорбут үлэлэрин туттарбыттара, онтон түмүктэрин билиһиннэрбиттэрэ. Үөрэнээччилэр Нам селотун иһигэр баар кафеларга меню оҥорон презентациялаатылар, итиэннэ, сэрэбиэй түмүгүнэн, бэйэлэригэр түбэспит маҕаһыыннарга, тэрилтэлэргэ видеоролик быһыытынан реклама оҥордулар.
Балаҕан ыйын 23 күнүгэр Ольга Григорьева «Сделано в Якутии» ассоциация председателэ кыттыылаах, бэйэ бородууксуйатын оҥорон таһаарар предпринимателлэргэ анаан семинар ыытылынна. Кини улууспут табаары оҥорооччуларыгар ассоциация билиҥҥи үлэтин-хамнаһын, препринимателлэргэ туох көмө оҥоһулларын туһунан билиһиннэрдэ. Маны таһынан, «Система пищевой безопасности на основе принципов ХАССП. Основные требования и ошибки при разработке и внедрении в производстве» диэн тиэмэлээх семинарга, ООО «Рост-Профи» стандартизация киинин директоры солбуйааччыта Туяра Чиряева нормативкалар тустарынан кэпсээтэ.
Балаҕан ыйын 24 күнүгэр, сарсыарда 10 чаастан күнүс 1 чааска диэри, туризм эйгэтигэр үлэлиир-хамныыр дьоммутугар улууспут культурнай-духуобунай туризма сайдыытыгар анаан оҥоһуллубут «Намские просторы» диэн бырайыак презентацията буолла. Бу күн биһиги предпринимателлэрбитин профессиональнай бырааһынньыктарынан эҕэрдэлээн туран, махтал суруктары туттардыбыт.
Майя ФЕДОРОВА
Источник: ulus.media