Балаҕан ыйын төрдүс өрөбүлэ — Предприниматель күнэ. Быйыл бу күн балаҕан ыйын 26 күнүгэр бэлиэтэннэ.
Предприниматель күнүн чэрчитинэн, «Бизнес-дело семейное» диэн бастакы республикатааҕы форум «Орто дойду» туристическай комплекска ситиһиилээхтик буолан ааста. Форумҥа «Перспективы развития семейного бизнеса» сессия, «Лучшие семейные предприятия Якутии — 2021» бырайыак-конкурс ыытылыннылар. Конкурска республика араас улуустарыттан, куораттарыттан барыта 34 сайаапка киирбит. Ол курдук, Дьокуускайтан, Алдантан, Мииринэйтэн, Өлүөхүмэттэн, Үөһээ Халыматтан, Үөһээ Бүлүүттэн, Бүлүүттэн, Сунтаартан, Кэбээйиттэн, Намтан, Амматтан, Мэҥэ Хаҥаластан бэйэ дьыалатын тэриммит дьиэ кэргэттэр мустан уопуттарын атастастылар. Конкурс түмүгүнэн Нам улууһуттан «Партизанский хлеб» чааһынай пекарня салайааччыта Елена Эверстова «Лучшее семейное предприятие Якутии в сфере торговли, общественного питания, производства хлеба и кондитерских изделий» анал аат хаһаайкатынан буолла. Бэлиэтээн эттэххэ, «Партизанский хлеб» пекарня дьиэ кэргэн бизнеһэ буолар. Манна үс көлүөнэ: салайааччы Елена Эверстованы кытта уолаттара Григорий, Иван, кыыһа Анна уонна сиэнэ Данил үлэлииллэр. Маны тэҥэ, Нам селотун олохтооҕо, «Ленские зори» дьиэ кэргэн туристическай баазатын директора Юрий Ермолаев СР Правительствотын председателин солбуйааччы Михаил Никифоров махтал суругунан наҕараадаланна.
