Дьэ, талааннаах дьон оҥорор да буолаллар эбит! Маннык ыраастык, кичэллээхтик, сатабыллаахтык өрүллүбүт кылтан сэлээппэлэри, суумкалары, илин кэбиһэрдэри, дэйбиирдэри арааһа, улахан таһымнаах улахан быыстапкаларга көрөн аһарыахха сөбө буолуо. Биһиги улууспутугар Балаҕаннаахха ураты талааннаах Наталья Казакова диэн нарын — намчы бэйэлээх саха талааннаах кыыьа норуоппут төрүт дьарыгын тилиннэрэн, дьон-сэргэ болҕомтотугар таһаарар, атыылыыр.
— Наталья, хаһааҥҥыттан сиэлтэн, кылтан оҥоһуктары оҥорон дьарыктанаҕын? Хантан үөрэммиккиний? Сэһэргии түс эрэ…
— Мин кылтан, сиэлтэн, ол эбэтэр сылгы кутуругуттан араас сэлээппэлэри, илин кэбиһэрдэри, суумкалары, дэйбиирдэри оҥоробун. Дьарыктаммытым балай да ыраатта. Аан бастаан ийэм Наталья Ивановна бу дьарыгы саҕалаабыта. Дьиэ кэргэммитигэр бииргэ төрөөбүттэр түөртпүт. Үс кыыс уонна биир уол. Кыргыттар бары дьарыктанабыт. Ийэбит бу дьарыкка уһуйбута.
— Матырыйаалгытын хантан, хайдах ылаҕытый?
— Сылгы кутуругун анаан-минээн туттарар, атыылыыр дьон бааллар. Кинилэртэн атыылаһабыт. Маҥан өҥнөөх кутурук уустук соҕустук көстөр.
— Судаарыстыба көмөтүнэн туһаммыккыт дуо?
— Судаарыстыба көмөтүнэн туһанан бөҕө буоллаҕа дии. Онон дэйбиир оҥорорбор станок арааһын ылыммытым. Балаҕаннааҕым нэһилиэгин баһылыгар Степан Иванович Дмитриевкэ уонна Прасковья Петровнаҕа улахан махталбын биллэрэбин. Самозанятай буоламмын бэйэ дьыалатын саҕалаан, сайыннара сылдьарбыттан үөрэбин. Оҥоһуктарбын аан бастаан дьоҥҥо-сэргэҕэ биллибэккэ, бэйэм кистээн оҥорооччубун. Онтон үчүгэйдик сатаан баран үлэлэрбин бассаап ситиминэн тарҕаталаабытым. Бу оҥоһуктарбын оҥорорбор соҕотох буолбатахпын. Икки эдьиийдэрим Марина уонна Мария куруук күүс-көмө буолаллар.
— Аны сайын биһиги улууска Олоҥхо ыһыаҕа ыытыллыаҕа. Улууспут хас биирдии киһитэ сахалыы тупсаҕай таҥастанаары бэлэмнэнэллэр. Эн кылтан, сиэлтэн оҥоһуктарга сакаас ылаҕын дуу?
— Сакаастар утары киирэн иһэллэр. Саҥа дьыл кэннэ өссө элбэх сакаас киириэхтээх. Улууспут эрэ дьоно буолбакка, хаачыстыбалаах диэн көрөн сөбүлээннэр, Дьокуускайтан, Бүлүүттэн сакаастаан ыллараллар. Оннооҕор Өлүөхүмэттэн сакаастаан почтанан ыыттарбыттара.
Төһө кыалларынан элбэх оҥоһуктары оҥоро сатыахпыт. Дьон сүрүннээн наборунан атыылаһаллар. Наборга сэлээппэ, суумка, илин кэбиһэр киирэллэр. Сыаната сэлээппэ хайдах өҥнөөҕүттэн, кээмэйдээҕиттэн тутулуктаах буолар. Сэлээппэ сыаната сэттэ тыһыынчаттан саҕаланар, уопсай набор 20 тыһыынча солкуобайтан тахса сыаналаах буолар.
Инникитин былааннарым диэн, үлэлэрбин дьон-сэргэ сэҥээрэрин, атыылаһарын туһугар күүскэ үлэлэһиэм.
Бу курдук олус хаачыстыбалаах, кыраһыабай оҥоһуктары нарын-намчы тарбаҕынан ураннык чочуйан Наталья күннэтэ өрөр, киэргэтэр, тупсарар. Олохтоох матырыйаалтан оҥоһуллубут чэгиэн, кыраһыабай, эмтээх оҥоһуктары хас биирдии саха сиригэр олорор киһи киэн тутта, киэргэнэ кэтэн, иилинэн самаан сайыҥҥа, сахалыы улахан тэрээһиннэргэ сайгыччы хаамыаҕа! Kil.siel.natalia сигэнэн киирэн Наталия инстаграм сирэйигэр подпискаланыаххытын,оҥоһуктарын көрүөххүтүн, санаа үллэстиэххитин сөп.
Екатерина Николаева
Валентина Филиппова