Дойду үрдүнэн сабардаабыт дьаҥ ыарыыта экономикаҕа охсууну оҥорон, өҥөнү онорооччуларга, оҥорон таһаарааччыларга уустук балаһыанньа үөскээн, Арассыыйа бэрэсидьиэнэ Владимир Путин бу салааны сайыннарар туһугар эбии миэрэлэри ылбыта. Ньурба улууһун салалтата дойдуга үөскээбит уустук балаһыанньаны өйдөөн, өйөбүл быһыытынан быйылгы сыллааҕы бүддьүөттэн биисинэһинэн дьарыктанааччыларга К2 коэффициенынан төлүүр нолуоктан босхолоноллоругар эбии дьаһаллары олохтообута.
Төһө да ыарыы турдар олох иннин диэки салҕанан барар. Дьон санаатын түһэрбэккэ, бэйэ дьыалатын арынан сонун саҕалааһыннарга ылсар, дьиэ кэргэнин иитэр туһугар сүүрэр-көтөр, күннэтэ түбүгүрэр. Ону бу да холобурга көрөбүт. Ньурбаҕа корейскай кухняттан саҕалаан, «Food-Лавка» дьиэҕэ илдьэн биэрии сулууспалар үлэлииллэр.
Корейскай кухня «Милли» – кухня мира» салайааччыта Татьяна Ефремова:
“Соторутааҕыта бэйэ дьыалатын арынан, үлэбин саҕалаатым. Сакаас төһө киирэринэн үлэ барар. Биһиги өҥөбүтүнэн туһанааччыларга күүтүллүбэтэх бэлэхтэр, мантан инньэ “Кухня мира”, “Блюдо от шефа” аахсыйалар былааннаналлар. Инникитин эт бородууктатыттан араас бүлүүдэлэр баар буолуохтара”.
Онтон ИП Николаев В.А. кулун тутар ыйтан «Food-Лавка» сулууспатын үлэлэтэр. Василий Николаев кылгастык үлэтин туһунан билиһиннэрэр:
“Мин бэйэ дьыалатын арыныам иннинэ Дьокуускай куоракка поварынан үлэлээбитим. Талан ылбыт идэм миэхэ барсар, минньигэс гына астыыр буоламмын, төрөөбүт дойдубар «Food-Лавка» аһарга санаммытым. Бу дьыаланы саҕалыырбар улуустааҕы Биисинэс киин докумуоннары толорууга, рекламаҕа өйөбүл буолбута. Кулун тутар ыйга кииҥҥэ резидент быһыытынан киирэммин бастакы сылбын үлэлиибин.
Аһааппытын кытары хааччахтыыр миэрэлэр биллэриллибиттэрэ, онтон аны саас федеральнай суол сабыллан харгыстары көрсүбүппүт. Сайын үлэбит тахсыылаах этэ, бастайааннай килийиэннэри булбуппут. Инники үлэбит пандемия төһө өр барарыттан тутулуктаах”.
Түргэн-тарҕан туттуулаах, минньигэс тотоойу астаах урбаанынан дьарыктанааччылар элбэх килийиэннэрдээх буоллуннар, ылыммыт былааннара туолан истиннэр.
Автор Антонина Семенова
Подробнее: ulus.media