Кэлиҥҥи кэмҥэ дьон дьиэтин омук сирин баараҕай дьиэлэринээҕэр туох да итэҕэһэ суохтук туттар буолла. Маны таһынан сүрэх баҕатынан дьиэҕэ сөптөөх, табыгастаах гына сакааһынан миэбэл оҥотторор буоллубут.
Бэйэбит чулуу ыччаппыт, Нам нэһилиэгиттэн төрүттээх Манчаары Колодезников, 2011 сыллаахха орто оскуолатын бүтэрбит эдэркээн уол, 2016 сыллаахха Дьокуускайдааҕы тыа хаһаайыстыбатын академиятын ситиһиилээхтик үөрэнэн бүтэрбитэ. Устудьуон сылларыгар Үөһээ Бүлүү улууһун «Ураан» эдэр ыччат түмсүүтүгэр лидерынан таһаарыылаахтык үлэлээбитэ. Кини билигин «Үс кут мебель» тэрилтэни арыйан, араас бырайыактары ылсан, дьон дьиэтин тупсаҕай оҥорор туһугар элбэх сыратын-сылбатын ууран үлэлэтэр саха биир чулуу урбаанньыта буолар. «Ураан» түмсүү мин олохпор сүдү уопуту биэрбитэ, улууһум биир күүстээх түмсүүтүгэр улахан махталлаахпын. Онно дьону кытта бииргэ алтыһар, үлэлиир, уопсай тылы булар эридьиэстэрин, эр киһи хатарыллар оскуолатын бастакы хардыыларын билбитим. Бу мантан сирдэтэн урбаанньыт буолар суолум-ииһим саҕаламмыта диэххэ сөп» — диэн бүгүҥҥү ыалдьыт кэпсээнин саҕалыыр.
— Бэйэбин «маһы ыллатар» ууспун дэммэппин. Мин уус, үлэлиэн баҕалаах дьоҥҥо усулуобуйаны тэрийэр киһибин дэнэбин. Бары ирдэбилгэ эппиэттиир, киэҥ-куоҥ, сылаас, ыраас сыах тэрийэн үлэлэтэбин. Онуоха үлэлииргэ эппиэттиир бары усулуобуйа бары тэриллэр, наадалаах туттар тэрил, иллээх-эйэлээх кэлэктиип барыта баар.
— «Үс кут мебель» туох өйдөбүллээҕий?
— Аан бастаан кэргэмминээн Ньургуйааналыын саҕалыырбытыгар реклама, сакаас өттүгэр күүскэ үлэлээбиппит. Саха киһитэ буоларым быһыытынан, бастакыттан сахалыы аакка-суолга сүрэхпит чугас этэ. Элбэх ааты сыымайдааһын түмүгэр бу аат иһиллиитэ, суолтата даҕаны чугас буолбута. «Үс кут мебель» ааты ылынаат, логотип оҥорбуппут. Кэргэним миэхэ күүс-көмө буолар. Кинитэ суох туох да табыллыбат. Кини тэрилтэбитигэр тутаах үлэһит – бухгалтер. Сарсыардаттан күн киириэр диэри биир долгуҥҥа сылдьар буоламмыт, олус тапсабыт. Бу — бэйэ-бэйэни ситэрсии буолар.
— Дьон хайдах миэбэли сөбүлээн сакаастыырый?
— Билиҥҥи олох хардыытынан, дьон өйө-санаата судургу, итиэннэ бары өттүнэн туттарга табыгастаах миэбэлгэ санаата сытар буолла. Ол-бу араас эриэхэбэй ыскааптары, оһуордааҕы дьон сөбүлээбэт, төһөнөн борустуой – соччонон сыаналаах курдук көстөр буолла. Элбэх пуолкалаах, уоттаах-күөстээх миэбэли ордороллор. Ааспыт сылга диэри глянцевай миэбэли сакаастыыр эбит буоллахтарына, билигин матовай матырыйаалы ордорор буол лулар. Сиэрэй өҥнөөх миэбэли сөбүлээн сакаастыыллар.
— Үлэһит дьон иннигитин-кэннигитин ыйдаҥардан көрөр буолуохтааххыт. Миэбэлгэ хайдах муода кэлээри турар?
— Эһиил оһуордаах, ол эбэтэр «рифленые фасады» диэн муода кэлээри турар. Ол эрэн, дьон туттарга табыгастаах, муодаттан хаалбат гына оҥотторор, онтон харчылаах дьон сыл аайы миэбэлин уларытар. Хас биирдии сакаас сыаната үп төһөнү уйарынан буоллаҕа.
— Тэрилтэҕитигэр хас үлэһиттээххитий?
— Билиҥҥитэ 26 үлэһиттээхпит. Бары тус-туһунан дуоһунастаахтар, ол иһигэр 8 миэбэл таҥааччы биригээдэ баар, 3 менеджер, сорохтор станокка үлэлииллэр. Үөһээ Бүлүү улууһуттан 7 уол үлэлии сылдьар. Кэлэр сылга Оҥоһуктарым – оҕолорум… дойдубар филиал арыйан үлэлэтэр сыал-сорук турар. Кыаллыа диэн эрэллээхпин.
— Манчаары, түмүккэ ыччат дьоҥҥо тугу этиэҥ этэй?
— Кыаллыбат диэн суох. Санаа кыайарын барытын олоххо киллэрэргэ дьулуһан иһиэххэ наада. Санаа, баҕа күүһэ барытын ситиһэр эбит диэн санааҕа кэллим. Санаммыт дьыалаҕыт сатаммат, эһиэхэ дохуоту киллэрбэт буоллаҕына, наһаа күүһү-уоҕу, үбү-харчыны тоҕо-тоҕо бэйэни сиэртибэлиир наадата суох. Сатаммат буоллаҕына, саҥаны саҕалааҥ. Толлумаҥ! Эдэр эрдэххэ сэниэҕитин, талааҥҥытын, дьоҕургутун сүрэххит сытар, илиигит кыайар дьыалатыгар анааҥ диэм этэ. Итиэннэ, бастатан туран, өскөтүн эн үлэһиттээх буоллаххына, үлэ усулуобуйатын тэрийэн, кинини үчүгэй хамнастаан, тэрилтэ тэбэр сүрэҕэ курдук көрдөххө, үлэ ордук тахсыылаах буолар. Ылсыбыккытын ыһыктымаҥ!
Эдэр, бэйэбит уолаттарбыт маннык олохтоохтук тэринэн үлэлии-хамсыы сылдьалларыттан киһи үөрэр. Бу хаартыскаҕа көстөр миэбэллэр – хас биирдии хаһаайка баҕа санаалара.
Валентина Догоюсова
Екатерина Николаева
ГАУ РС(Я) «Центр «Мой бизнес»