Горнай улууһун Одуну нэһилиэгэр «Сашок» диэн ааттаах таҥас-сап тигэр, оонньуур оҥорор айар мастарыскыай аһыллан таһаарыылаахтык үлэлии турар. Бу мастарыскыай тэрийээччитинэн урбаанньыт Вера Петровна Лиханова буолар. Билиҥҥи сайдыылаах үйэҕэ сымнаҕас экологическай таҥас ордуга, туһата быдан буоллаҕа. «Сашок» айар мастарыскыай туһунан салайааччы Вера Петровна Лиханова маннык кэпсиир:
— «Сашок» айар мастарыскыай баар буолуутун төрүөтэ диэн, Саша диэн бэйэм оҕом аата, кини бастакы бөлөх инбэлиит. Кинини ханна да үөрэххэ, үлэҕэ да ылбаттар, ол иһин оҕобун үлэлэтэр, үөрэтэр сыалтан тэрийбитим. Бастаан, биллэн турар, тугу гынабыт, туохтан саҕалыыбыт диэн ыйытык үөскээбитэ. Оҕону кытта элбэх сыллаах үлэ түмүгэр иистэнэр баҕа санаата үөскээбитэ. Ол курдук, оҕуруо да уктаран көрбүтүм, пластилинтан да оҥоһукка холоммуппут, уруһуй да баара. Таҥаһынан оонньуур тикпиппитин сэнээрбитэ. Үөрэ-көтө көмөлөһөрүн бэлиэтии көрөммүт, үлэлиир хайысхабыт бу сылдьар эбит диэн тигии хайысхатын талбыппыт, сымнаҕас оонньуурдары бастаан тигэн саҕалаабыппыт.
2018 сыл бэлиэтин — ыт оонньуурдары тигэн киирэн барбыппыт. МОМО «Амма кырдалын ыччата» салайааччыта С.А. Неустроева саҕалааһыммытын бэлиэтии көрөн, «Подари чудо» бырайыакка кыттыбыппыт. 600 бэлэх оонньуурдары инбэлиит, тулаайах оҕолорго, элбэх оҕолоох ыаллар оҕолоругар бэлэхтээбиппит. Инньэ гынан үлэбит атыыттан буолбакка бэлэхтэн саҕаламмыта, ол эмиэ оруолу оонньоото дии саныыбыт». Дьиэҕэ туттуллар сахалыы тыыннаах текстильнэй таҥаһы тигэр баҕа санааттан, Иваново куоракка фабрикалары кытта кэпсэтии ыытан, сөптөөх фабриканы булан, эскиз ыытан үлэлэһэн киирэн барбыттара. Ыччат министиэристибэтин грант-куонкурсугар кыттан, конкурска кыайан 1,4 мөл. солк. ааспыт сыл ахсынньы ыйыгар ылбыттар. Вера Петровна нэһилиэгэр ыҥырыы таһаарбытыгар биэс эдэр ийэ кэлэн мастерской үлэтэ саҕаламмыт. Манна
Одуну нэһилиэгин дьаһалтата бу саҥа саҕалааһын үлэтин өйөөн, босхо улэлиир хос уларсыбыта кэрэхсэбиллээх. »Сашоктар» билигин утуйар таҥас араас көрүҥүн, штора, кэтэр танас, сахалыы кэтэр танас, брошка тигэллэр. Иистэнэр тэриллэрэ барыта промышленнай улахан кыамталаахтар.
Билигин оноһуктарын Маҕараска, Бэрдьигэстээххэ »Южный”эргиэн киинигэр , “ДОБРАЯ ХОЗЯЙКА” маҕаһыыннарга атыылыыллар. Аныгы кэм сиэринэн инстаграмм страницалаахтар: @tmsashok_ykt, манна дьоннор кинилэр үлэлэрин көрөн сакаастаабыттарынан республика араас муннугар оҥоһуктарын ыыталлар.Дьокуускай олохтоохторугар эппит аадырыстарыгар тиэрдэн биэрэллэр эбит. Сыаналара удамыр, матырыйаалларыгар натуральнай бязь, поплин, перкаль, сатин таҥастары тутталлар. Кэлиҥҥи кэмҥэ сахалыы таҥаһы тигэргэ ылсан үлэлииллэр эбит.
Инникитин балыыһа, оҕо саада, оскуола курдук улахан тэрилтэлэртэн утуйар таҥас, остуол сабыыта, штора, соттор тигиитигэр сакаас ыларга уонна тириини таҥастыыр салааны киллэрэргэ үлэлэһэрдии былааннаналлар.
Вера Петровна үс оҕо амарах ийэтэ, саамай кырата алта ыйдаах. Ыал аҕата Николай Николаевич бэйэтэ эмиэ урбаанньыт. Улахан кыамталаах массыынанан тиэйэр-таһар өҥөлөрү оҥорууга үлэлэһэр. Эдэр ийэ аныгы олох тэтимнээх хаамыытын уйулҕатынан билэн, оҕотун инникитин эрдэттэн оҥорон, үлэ миэстэтин таһааран олус сөптөөх уонна көмөлөөх бизнеһы саҕалаабыта хайҕабыллаах суол.
Сайдам саха сиэдэрэйдик тутан-хабан оҥорбута үйэлээх, кичэллээх буолар. Иистэнньэҥ ийэлэр сымнаҕас, сылаас илиилэрэ дьоҥҥо туһалаах буоллун диэн санаанан тикпит эгэлгэ араас, кэрэчээн оҥоһуктара, бу мастарыскыай үлэтигэр алгыс буоллуннар!
Источник: UlusMedia