Новости "Центра "Мой бизнес"
Сөбүлүүр дьарыктан дохуот оҥостор табыгастаах буолла
2 декабря 2020

Предпринимательство эйгэтигэр саҥа сүүрээн киирэн дьону сэргэни интэриэһиргэтэр, ордук сөбүлүүр дьарыктарынан эбии дохуоттанар дьону. Ол курдук, бүгүн бэйэ дьарыктаах буолуу («самозанятые») туһунан кэпсэтиэхпит.

Бу сүүрээҥҥэ дьоҕус дьарыктаах дьон (торт астааччылар, кыламан, тыҥырах,араас өҥөнү оҥорооччулар, иистэнньэҥнэр, оҥорон таһаарааччылар, такси о.д.а.) хапсыахтарын сөп. Кинилэр сыллааҕы дохуоттара 2 мөл. 400 солк үрдүө суохтаах уонна эбии үлэһиттэри наймылаһыа суохтаахтар.

Самозанятай предпринимательтэн туох уратылааҕый? Бу ыйытыкпытын Саха сиринээҕи «Мин бизнеһым» өҥөнү оҥорор киин Үөһээ Бүлүүтээҕи салаатын салайааччыта Екатерина Николаеваҕа биэрдибит.

«Самозанятай киһи предприниматель курдук биэнсийэ, страховой взностары төлөөбөт, отчуот оҥорбот. Тэрилтэлэри кытары (ХЭУо) куттала суох үлэлиир кыахтанар. Киирбит дохуоттан тэрилтэттэн 6%, физическэй сирэйтэн 4% төлүүр, дохуот суох кэмигэр тугу да төлөөбөт. Бу бырагыраама үлэлээбэт биэнсийэлээх дьоҥҥо табыгастаах, тоҕо диэтэр икки сылга биирдэ бэриллэр босхо проеьынан туһаныахтарын сөп», — диэн кэпсээтэ Екатерина Васильевна.

Маны таһынан, бүддьүөт үлэһитэ «самозанятай» буоллаҕына, киниэхэ туспа харчы түһэригэр каарта арыллар. Хамнас каартатыттан туспа буолан, булкуйбат.

Бу бырагыраама быйыл от ыйын 1 күнүттэн үлэлиэҕиттэн үгүс киһи «самозанятай» буолла. Маны таһынан үлэлии сылдьар предпринимателлэр бу бырагыраамаҕа көстүлэр, сорохтор иккиэннэрин тэҥҥэ үлэлэтэллэр. Үксүн бүддьүөт үлэһиттэрэ эмиэ «самозанятай» буоларга  дьулуһаллар эбит. Бүгүҥҥү туругунан, Үөһээ Бүлүүгэ 78 киһи регистрацияланна, бу сыыппара өссө да үрдүө диэн Екатерина Васильевна сабаҕалыыр.

Хайдах «самозанятай» буолабыт?

Бу олус судургу эбит. Төлөпүөҥҥэ «Мой налог» сыһыарыыны хачайдаан баран, боппуруостарга хоруйдуугут, түһүмэхтэри толороҕут — регистрацияланаҕыт. Маны таһынан предпринимателлэр «самозанятайга» көһөллөрүгэр эмиэ сыһыарыы нөҥүө, эбэтэр нолуогабай уоргаҥҥа, МФЦ киинигэр билсиэхтэрин сөп. Мунчаарар боппуруостаах буоллаххытына, быһаччы Екатерина Васильевнаҕа үлэ күнүгэр билсэҕит.

«Самозанятайга» туох чэпчэтии баарый?

Бырагыраама үлэлиэҕиттэн, хас биирдии регистрацияламмыт киһиэхэ, коронавируһунан сибээстээн, нолуок төлүүргэ диэн «Путин бонуһа» көрүллэр. Итиэннэ предпринимателлэри кытары ыкса үлэлэһэр «МСП банк» 6.25%-наах чэпчэтиилээх кирэдьиити биэрэн саҕалаата.  Кирэдьиити ылар киһи иэһэ-күүһэ суох буоллаҕына саҥа саҕалааччыларга 500 тыһ. солк., 6 ый үчүгэйдик үлэлээбит дьоҥҥо 1 мөл. — 5 мөл. тиийэ иэстиэхтэрин сөп.

Туох эмит мунаахсыйар ыйытыктардаах буоллаххытына, Үөһээ Бүлүү бөһүөлэгин дьаһалтатын 107 хоһугар эбэтэр төлөпүөнүнэн үлэ чааһын кэмигэр Екатерина Васильевнаҕа билсиэххитин сөп: +79142372021.

Мария ВАСИЛЬЕВА

РГ Верхневилюйск