Новости
Сүрэхпитин, дууһабытын ууран туран үлэлиибит
17 августа 2018

Улууспутугар 2015 сылтан «Сардаана» мини-бэкээринэ ситиһиилээхтик үлэлии турар. Салайааччыта Сардана Осипова Үөһээ Бүлүү төрүт олохтооҕо. Кыра сааһыттан ийэтин, бэкээринэттэн хаҕыс да халбарыйбакка үлэлээбит  Раиса Ивановна Сергееваны батыһа сылдьан ас астыырга үөрэммитэ.

Сардана Андреевна И.Барахов аатынан орто оскуоланы түмүктээт, улуустааҕы бэкээринэҕэ үлэҕэ киирбитэ, онно 20 сыл үлэлээбитэ. Салгыы Дьокуускай куоракка күһүн, олохсуйан, 14 сыл чааһынай урбаанньыт бэкээринэтигэр үлэлээбитэ. Ол сылдьан, дьонун сүбэлэринэн Мэҥэ-Хаҥалас улууһугар тахсан бэкээринэ арыйа сылдьыбыта. Онтон төттөрү дойдутугар төннөн, икки сыл курдук бэрэски атыылаан, харчы мунньунан, бэйэтин күүһһнэн мини-бэкээринэни арыйарга санаммыта.

Мини-бэкээринэҥэ күннэтэ килиэп, батон, лаваш, минньигэс сдобнай буулкалар, бөрүөктэр, бэрэски хас да көрүҥэ, пицца, слоенай тиэстэттэн араас выпечка оҥороллор. Ону таһынан, бэрэски тиэстэтин атыылыыллар.

Манны таһынан, «Сардаана» Ленин аатынан уулуссаҕа филиал арыйбыта. Онно бииргэ төрөөбүт быраата Айсен Матвеев үлэлиир. Мини-бэкээринэ икки сиринэн 6 үлэһиттэрдээх. «Биһиги үлэбитин дьиэ кэргэн биисинэһинэн ааҕыахха сөп, бары астыырбытын сөбүлүүбүт. Түүн, күнүс балтылаах быраатым Айсиэнэ уонна Айталын Семеновтар килиэп буһараллар. Килиэп 5-6 оборотунан буһар, күнүттэн көрөммүт бэнидиэнньиккэ уонна бээтинсэҕэ 7 оборот гынабыт», — диэн кэпсиир.

— Сардана Андреевна, үлэҕиттэн ордон, дьиэҕэр астыыргын төһө сөбүлүүгүн?

— Мин икки уолаттардаахпын, син биир күн аайы астыыбын. Уолаттарым астыылларын эмиэ олус сөбүлүүллэр. Дьиэнэн олорон күннээҕи сонуннарбытын кэпсэтэ-кэпсэтэ  манты оҥорорбутун ордоробут.

— Эһиги астыыр аскыт мэлдьи минньигэс, тотоойу буолар. Сэкириэккин арыйыаҥ дуо?

— Бу боппуруоска эппиэтим биир буолар: сүрэхпин, дууһабын ууран туран астыыбын. Оннугу бииргэ үлэлиир дьоммуттан эмиэ ирдиибин, наар үчүгэй настырыанньалаах, дьоҥҥо үтүөнү баҕара-баҕара астааҥ диэн сүбэлиибин.

— Биисинэскэ, биллэн турар, үтүө да, хараҥа да өттө баар буолар. Эһиги үлэлэтэр дьыалаҕыт барыыстаах дуо?

— Уот сыаната урбаанньыттарга анаан кыччаабытыттан үөрэбин, урут 9 солк. харчыны тахса сылдьыбыт буоллаҕына, билигин 4 солк. тиийэ түстэ. Билигин мин дьиэ уларсан үлэлии турабын, ыйдааҕы төлөбүрбэр элбэх харчы барар. Ол иһин, кыах баара буоллар, учаастак ылынан баран маҕаһыын туттуом этэ. Бородууктабын күн аайы атыылаһабын, хата маҕаһыын салайааччылара миэхэ утары бараннар чэпчэтии оҥороллор.

— Инники былааныҥ?

— Үлэлии сылдьан көрдөхпүнэ, дьон үксэ слоенай тиэстэттэн оһуллубут аһы атыылаһар. Мантан сиэттэрэн, анал хатайдыыр аппарат атыылаһыахпын баҕарабын.

Сардана Андреевналын кэпсэтэ олордохпутуна, элбэх киһи киирэн, саҥа буспут минньигэс ас арааһын атыылаһан, үөрэн-көтөн таҕыстылар. Көрдөххө, үксэ буулкалары уонна килиэби атыылаһаллар эбит. «Сардаана» мини-бэкээринэ эрэллээх клиенэ Николай Николаев пицца уонна бэлэм тиэстэни атыыласта: «Биһиги дьиэ кэргэн «Сардаана» аһын олус сөбүлүүбүт. Астара өрүү минньигэс. Кинилэргэ ситиһиини уонна сайдыыны баҕарабын!» — диэн баҕа санаатын этэн таҕыста.

 Мария Васильева

Үөһээ Бүлүү.