Алын дохуоттаах дьиэ кэргэҥҥэ көрүллэр, социальнай хантыраакка быйылгы сылга улууска 8 мөл. 640 тыһ. солк. үп көрүллүбүт. Бу харчы уопсайа 28 квотаҕа тыырыллан, бэйэ дьыалатын арыйыан, салгыы сайыннарыан баҕалаахтарга барыаҕа.
Муус устар 14 күнүгэр, улуус дьаһалтатын аактабай саалатыгар, судаарыстыба биэрэр көмө харчытын ылан, бэйэ үлэтин саҕалыан баҕалаах, 10 киһи бырайыагын хамыыһыйа иннигэр тахсан көмүскээтэ. Бу сылга хантыраагы биэрии балаһыанньата инники сыллартан кыра уларыйыылардаах, бастатан туран көрүллэр үп кээмэйэ 300 тыһ. солк. тэҥнэспит, бу сыана ыарыы турар кэмигэр улахан тоҕоостоох буолбут, ону тэҥэ көмөнү туһаммыт киһи хайаан да самозанятайга эбэтэр ИП быһыытынан регистрацияны ааһыахтаах. Маннык көмөнү дьиэ кэргэҥҥэ уопсайа икки төгүл бэриллэр.
Бырайыак көмүскээһинигэр Маҕарастан үс, Орто-Суртан биир, Бэс Күөлүттэн биир, Бэрдьигэстээхтэн биэс киһи кытынна. Маннык бизнес бырайыактары көмүскээтилэр: тимиринэн уһаныы, иистэр массыына ылааһын, ыраас ууну бытыылкаҕа кутуу, түүлээх таҥаһы тигии, автосервис, евро-клининг өҥөлөрө, үнүстүрүмүөннэри уларсыыга, видеоҕа устууга, парикмахерскай, тыҥырах, кыламан оҥоруутугар. Хамыыһыйа быһаарыытынан 10 киһиттэн 7 киһи көмөнөн туһанан бэйэтин дьыалатын тэринэр буолла.
Ол курдук, Бэрдьигэстээхтэн Александр Макеев тимиртэн итипэккэ (Холодная ковка) оҥорооһун, Светлана Уйгурова ыраас ууну бытыылкаҕа кутуу, Александр Аргунов автомастерской,
Бэс Күөлүттэн Варвара Кирова кэрэ буолуу салона, Орто Суртан Любовь Антонова парикмахерскай, Маҕарастан Ньургуяна Константинова евро-клиниг өҥөтө уонна Ольга Данилова видеограф.
Бу курдук үтүө хамсааһын үбүттэн тирэх ылан, бэйэ дьыалатын сайыннаран үлэлии сылдьааччылар, улууспутугар аҕыйаҕа суохтар. Онон баҕалаахтар бэйэҕит нэһилиэккит дьаһалтатыгар сайаапкаҕытын, докумуоннаргытын салгыы биэриэххитин сөп. Харчы баар.