Ыам ыйын 13-14 күннэригэр улуустааҕы тэрилтэлэр икки ардыларынааҕы дьахталлар спартакиадалара буолан ааста. Уопсайа 12 тэрилтэттэн 11 хамаанда хомуллан, сүрдээх тыҥааһыннаах күрэхтэр буоллулар. Түһүмэхтэрэ бары араас-араас буолан, урут спортивнай күрэхтэргэ кыттыыны ылбат да кэрэ аҥардар кэлэннэр күөн көрсүбүттэрэ олус сэргэх, интириэһинэй буолла. Бу күрэхтэһиигэ урбаанньыктар уонна Дьарыктаах буолуу киинэ холбоон ”Сайдыы” диэн ааттаах хамаанданы туруоран ситиһиилээхтик кытыннылар.

Ол курдук икки күҥҥэ теннис, дуобат, хабылык, хаамыска, миэстэттэн ыстаныы, канат  тардыһыыта уонна волейбол курдук түһүмэхтэр ыытылыннылар.

Остуол оонньууларыгар 2 остуолга иккис миэстэни ИП Стручкова Анна Петровна ылбыта. Ону таһынан дуобакка 2 остуолга «Саха республикатын предпринимательствоны өйүүр киинэ» казеннай тэрилтэ МУ «СР Эбээн-Бытантай улууhа» туспа тутар салаатын сэбиэдиссэйэ Слепцова Ульяна Васильевна 3 миэстэни ылла.

Төһө да спартакиада өрөбүл күннэргэ ыытылыннар, ыал ийэлэрэ, эбээлэрэ, эдьиийдэрэ, балыстара хамаандалара кыайарын туһугар сарсыардаттан саалга мустан, тыҥааһыннаах киирсиилэргэ кыттыыны ылан, бэйэ-бэйэбитигэр ыалдьан, ыһыытаан-хаһыытаан, сэргэхсийэн, өрөбүл күннэрбитин интириэһинэйдик атаардыбыт. Бэл диэтэр, бу икки күн биллибэккэ да аастылар.

Тэрилтэлэр бары көхтөөх кыттыыны ылбыттара күрэхтэһэргэ да, көрөргө да сүрдээх үчүгэй. Саала иһэ толору кэрэ аҥардарынан туола түспүтэ. Ити курдук элбэх киһини муһар араас тэрээһиннэр куруук буола турдуннар! Манна өссө биир баҕа санаа, үгэс курдук буолар күрэхтэртэн ураты атын соҕус түһүмэхтэрдээх тэрээһини ыыталлара буоллар өссө үчүгэй, интириэһинэй буолуо этэ.

Источник: представитель Центра поддержки предпринимательства РС(Я) Ульяна Слепцова