Амма улууһун биир саамай кырыы нэһилиэгэр саҥа маҕаһыын арылынна. Эдэр киһи Илья Владимиров Сулҕаччы олохтоохторун аһынан дэлэйдик хааччыйар сыаллаах урбаанньыт буолла.

Тыа сиригэр, ордук кырыы нэһилиэккэ аһынан-таҥаһынан хааччыллыы хаһан баҕарар тыын боппуруос буолар. Амма Сулҕаччыта улуус кииниттэн сүүс килэмиэтир тэйиччи сытар ыраах нэһилиэк. Ол иһин күннээҕи олоххо саамай наадалаах малларынан, бородууктанан хааччылыы олохтоохтору долгуппат буолуон сатаммат. Онон ааспыт өрөбүлгэ Сулҕаччыга саҥа маҕаһыын аһыллыытын кинилэр күүппүттэрэ балачча буолла. Владимировтар дьиэ кэргэн сабыс-саҥа дьоҕус, сибиэһэй кырааска сыттаах маҕаһыыннарын аана тэлэччи аһыллан бастакы атыылаһааччыларын көрүстэ.

Владимировтар – эдэр ыаллар. Ийэлэрэ Надежда Михайловна оскуолаҕа үлэлиир. Ыал аҕата Илья Степанович урбаанньыт буолан маҕаһыын аһарыгар аймахтара, дьиэтин тутуутугар табаарыстара улахан көмө буоллулар. Онон нэһилиэкпитигэр икки маҕаһыыннанныбыт, аһынан-үөлүнэн хааччыйар эргиэн киинэ элбээтэ диэн бары даҕаны астынабыт. Маҕаһыын аһыллыыта билиҥҥи чэпчэкитэ суох кэмҥэ улахан үөрүүнү, сэргэхсийиини аҕалла.

Саҥа маҕаһыын элбэх атыылаһааччылардаах, бараммат табаардаах, өрүү сибиэһэй бородуукталаах буоллун.

Подробнее: ulus.media