Новости
ТААТТАҔА «СТЕКЛОПАКЕТ» ТҮННҮГҮ ХАМАҔЫТЫК САКААСТЫЫЛЛАР
22 октября 2019

Билигин ыаллар, тэрилтэлэр бары улаханнык наадыйар, туттар «стеклопакет» түннүктэрэ «Тёплый край» хааччахтаммыт эппиэтинэстээх уопсастыба, Дьокуускайга баар «Кангаласстааҕы индустриальнай паарка» урутаан сайдар территория тэрилтэтигэр оҥоһуллар. Манна Ытык Күөл олохтооҕо Алексей Иванович Попов кэргэнинээн Анна Григорьевналыын, аҕаларынаан Иван Николаевичтыын үһүс сылларын үлэлииллэр.

Тэрилтэҕэ генеральнай дириэктэринэн Анна убайа Ньургустаан Иванович Иванов, быраата Григорий Григорьевич Бондарев сэндвич-панель оҥоһуутугар сыах начаалынньыгынан үлэлииллэр. Маннык панелларынан гараһы, хотону, атыы-эргиэн дьиэлэрин тутталлар. Бу улахан тэрилтэ сүнньүнэн аныгы «стеклопакет» түннүгү оҥорор уонна олордор өҥөнөн дьарыктанар.

 

Кинилэргэ Алексей аҕата Иван Николаевич Дьокуускайтан түннүгү аҕалыыга, Ытык Күөл иһинэн, аадырыстарга тиэрдиигэ, тарҕатыыга бэйэтин массыынатынан таһан, түннүгү ыйыллыбыт сирдэргэ илдьэн олордууга улахан күүс буолар. Онон, Поповтар Ытык Күөлгэ үһүө буолан сарсыардаттан киэһээҥҥэ диэри үлэлииллэр.

 

Анна сүнньүнэн куоракка баар тэрилтэҕэ дилер быһыытынан, тэрилтэлэртэн, ыаллартан сакааһы ылыынан дьарыктанар. Түннүгү аҕалыы, аадырыстарга тиэрдии, дьиэлэргэ туруоран биэрии сүнньүнэн ордук сайыҥҥы өттүгэр ыам ыйыттан алтынньы бүтэһигэр диэри ыытыллар.


Билиҥҥи туругунан Ытык Күөлгэ маннык түннүгүнэн кинилэр эрэ дьарыктаналлар. Абыраллаах түннүгү Таатта, Чурапчы, Мэҥэ Хаҥалас улуустарын Халыма федеральнай суолун кытыыларынан турар нэһилиэктэрэ босхо тиэйтэрэллэр. Томпо Кириэс Халдьаайытыттан, Мэҥэ Алданыттан, Хаандыгаттан бэйэлэрэ кэлэн ылаллар эбит.

Источник: Улуусмедиа