Олунньу иккис нэдиэлэтин бастакы күнэ Бүлүү улууһун олохтоохторугар анаан «Табун» атыы-эргиэн киинэ аанын нэлэччи арыйда.

Бүлүү куораппыт саҥа эргиэнин Киинин арыйыыга улуус  дьаһалтатыттан, куорат дьаһалтатыттан эҕэрдэ тыллары эттилэр.

Улуус баһылыга Сергей Винокуров бу  үөрүүлээх күҥҥэ «Табун» атыы-эргиэн Киин бастыҥ үлэһиттэригэр, эргиэн киинин туппут үлэһиттэргэ улуус  Бочуотунай грамоталарын, Иван Ивановичка, Оксана Афанасьевнаҕа Бүлүү улууһун социальнай-экономическай сайдыытыгар киллэрбит улахан үтүөлэригэр махтанан,   улуус дьаһалтатын Махтал суругун кытта сыаналаах анал бэлиэлэри туттартаата. Куорат дьаһалтатын баһылыга Ньургустаан Афанасьев  Бүлүү куоракка маннык аныгылыы ис хоһоонноох атыы эргиэн кииҥҥэ аһылларыттан «оҕолуу үөрэрин» этэн туран, куорат дьаһалтатын Грамотатын Иван Ивановичка туттарда.

Иван Иванович 3000 квадратнай киэннээх атыы-эргиэн Киинин 2018 сылтан  олохтоох урбаанньыт  Александр  Ильич Буслаевтыын саҕалааннар, урбаанньыт Агамалаев Гариб Джуматович тутар биригээдэтэ тутан, Бүлүү улууһун дьонугар уонна ыалдьыттарыгар анаан аныгылыы үйэ ирдэбиллэригэр толору эппиэттиир кафелаах, кофейнялаах, илии суунардаах, туалеттаах, элбэх эргиэн саалалардаах, иккис мэндиэмэнигэр эскалаторынан тахсыллар гына дьоҥҥо олус табыгастаах гына оҥоһуллубут киэҥ-куоҥ  Киини тутаннар Бүлүү дьонугар бэлэхтээтилэр.

Кииҥҥэ 7 арендатор нэһилиэнньэҕэ араас социальнай ис хоһоонноох өҥөлөрүн туһаныахха сөп эбит.   Ити курдук урбаанньыт Иван Иванов Кииҥҥэ эбии 10 үлэ саҥа миэстэтин арыйан, 98 үлэһиттээх «Урбаан» улахан коллектива бу иннинэ арыллыбыт «Долгунча», «Модун», «Табун» эргиэн кииҥҥэринээн нэһилиэнньэҕэ анаан үлэлиэхтэрэ-хамсыахтара.

Урбаанньыт Иван Иванов бу баараҕай Киини туттарарыгар Киин ис-тас үлэтигэр, штукатуркатыгар, уотугар-күөһүгэр олохтоох  уолаттар үлэлээннэр, саха сатаабатаҕа суоҕун, өссө биирдэ бигэргэттилэр диэн  тутууга  сахалар омуктартан итэҕэһэ суох үлэлээбиттэриттэн астыммытын бар дьонугар үөрүүлээх-быһыыга кэпсээтэ уонна  үлэһиттэригэр махтанна.

Сонуннарга анаан Андрей Яковлев – Чуос

Администрация МР «Вилюйский улус (район)» РС (Я)