Айар талааннаах Дария уонна Николай Татариновтар «Таал – Таал эмээхсин» диэн икки тылынан икки кинигэни бэлэмнээн таһаардылар. Кинигэлэр Дьокуускай куорат кинигэ маҕаһыыннарыгар уонна Аммаҕа улуус киинигэр атыыга таҕыстылар.
Амматтан төрүттээх биллэр дизайнер, стилист, худуоһунньук Дария (Олесова) кэргэнинээн Николай Татариновтыын саха остуоруйатыгар олоҕуран Таал – Таал эмээхсин туһунан икки тылынан икки саҥа кинигэни бэлэмнээн таһаардылар. Кинигэлэр «Саха остуоруйалара XXI үйэҕэ» сиэрийэнэн Новосибирскай куорат «Деал» типографиятыгар бэчээттэннилэр. Остуоруйаны СӨ бэчээтин туйгуна, биллэр суруналыыс, хомоҕой тыллаах хоһоонньут Жанна Леонтьева сахалыы тылбаастаата.
Бу Татариновтар дьиэ кэргэн бастакы бырайыактара буолар. Айар куттаах ыал кырачаан кыыстарын Полинаны бүөбэйдииллэр, хааччахтааһын кэмигэр хаайтарбакка тэйиччиттэн олорон көҥүл айаллар — туталлар, дьон сакааһынан эмиэ үлэлииллэр. Дария уруһуйдуур, историк идэлээх Николай ыстатыйалары, кэпсээни да суруйар. «Таал – Таал эмээхсин» остуоруойа бу күннэргэ куорат киинигэр баар кинигэ маҕаһыыннарыгар атыыга таҕыста. Амма ааҕааччыларыгар эмиэ айаннаан кэлэн урбаанньыт Анна Брызгаева маҕаһыыныгар киирдэ. Кинигэни ылыан баҕалаахтар @masterskaya_oiuu инстаграм сирэйинэн эбэтэр 89241779332 бассаап нүөмэринэн сакаастыахтарын эмиэ сөп.
«Биһиги саха норуотун остуоруйатын билиҥҥи кырачаан ааҕааччыга сөп түбэһиннэрэн оҥорбуппут уратыбыт буолар. Урукку остуоруйаларга өлүү, охсуһуу хартыыналара көстөн ааһар буоллахтарына, биһиги суруйуубутугар дьиэ кэргэн уонна таптал күүһэ өрөгөйдүүр. Бу остуоруйаҕа мууһу күн уулларара, күнү былыт хаххалыыра, былыты тыал үүрэрэ, тыалы хайа тохтоторо, ол аата айылҕа күүһэ, олох эргиирэ көстөр. Биһиги айар үлэбит сыалынан бу чаҕылхай кылгас остуоруйаны дьиэ кэргэн кыра саастаах оҕолорун кытта бииргэ ааҕаннар, ойууларын көрөннөр, мындыр өйдөөх өбүгэлэрбитин уонна бүгүҥҥү күммүтүн ситимниир сылаас эйгэҕэ киирэн тахсыахтара. Кинигэни оҥорор чэпчэки дьыала буолбатах эбит. Ол иһин биһиги үтүө санаалаах дьону кытта табыллан үлэлээбиппититтэн олус астынабыт. Кинигэбит тылбааһын оҥорбут бэйэтин идэтигэр бэриниилээх, тыл баайын, дэгэтин баһылаабыт суруналыыс эдьиийбитигэр Жанна Леонтьеваҕа, таҥыытын оҥорбут талааннаах Татьяна Неустроеваҕа, сүбэ – ама буолбут бары дьоммутугар улахан махталбытын тириэрдэбит», — диэн этэллэр Татариновтар дьиэ кэргэн.
