Аан дойду үрдүнэн хамсык ыарыыта туран үгэскэ кубулуйбут олохпут укулаата тосту-туора уларыйан турар. Ол туризм эйгэтин эмиэ хаарыйда. Арассыыйа дьоно-сэргэтэ урукку сылларга биир үксүн кыраныысса таһыгар тахсан сынньанара. Коронавирус ыарыыта тас дойдуларга эмиэ киэҥник тарҕаммыт буолан, Арассыыйа туристарын кыраныысса таһыгар айанныыртан туттуналларыгар ыҥыраллар.

Ол иһин бу кэмҥэ олохтоох туризм ордук сэҥээриллэр буолла. Түмэн-Эрилик иһитиннэрбитинэн, быйыл кини биир үксүн Саха сирин уонна улуус олохтоохторун Уус-Ньараҕа Өймөкөөн Киһилээхтэрэ – Таас Кыстаабыт, Афродита хайаларыгар арыаллаан сырытта. Эдэр киһиэхэ билигин бу дьарыга хобби буолар, кини сыыйа туризм эйгэтигэр толору көһөр санаалаах. Инникигэ былаана киэҥ – Күбүмэ учаастагын уонна Үчүгэй нэһилиэгин икки ардыларыгар баар “Хороту” күөл таһыгар туристическай база тутуута. Түмэн санаабыта сатанан, толкуйдаабыта тобуллан истэҕинэ күөлгэ, үрэхтэргэ катамарынан айаны, тустаах маршруту тэрийэн Сунтаар хайатын эҥэр сылдьыы,  күрүлгэннэри көрүү-истии курдук көхтөөх сынньалаҥ араас көрүҥүн тэрийэр ыра санаалаах.

Эдэр киһи кэнэҕэскитин бу сиргэ улуус эрэ таһымнаах буолбакка, өрөспүүбүлүкэтээҕи ыччат форумнарын тэрийэр киэҥ былааннаах. Маны сэргэ “Хороту” сиригэр-уотугар эдэр спортсменнар, тренердэр дьарыктанар базаларын үлэлэтэри былаанныыр. Кини туристары арыаллыыр киһи бэйэтэ эмиэ кыахтаах, күүстээх, эрэллээх буолуохтаах диэн санаанан салайтаран, успуордунан дьарыктанар, хас киэһэ аайы спорсаалаҕа тиийэн эрчиллэр.

Түмэн ыам ыйынааҕы уһун өрөбүллэргэ Уус-Ньараҕа Өймөкөөн нэһилиэгиттэн кэлбит олохтоох туристары арыаллаата. Дьиҥэр, улуус дьоно бэйэлэрэ даҕаны хайаҕа тахсыахтарын сөп буоллаҕа. Ол гынан баран Түмэн-Эрилик эппитинэн, билигин дьон үксэ мээнэ буолбакка, бөлөҕүнэн, тэрээһиннээхтик сынньанарын ордорор буолбут.

Кини этэринэн, дьиҥэр, Москубаттан, Арассыыйа араас куораттарыттан Өймөкөөн улууһугар кэлиэн баҕаралаах туристар элбэхтэр, манна хаста даҕаны сылдьыбыттара.

— Биһиги маршруттарбытын сэргиир киһи үгүс, — диир Түмэн. – Хомойуох иһин, өссө элбэх турист сылдьыаҕын сөмөлүөккэ билиэт сыаната олус ыарахана атахтыыр. Саха сиригэр көтөн кэлии 20-ча тыһыынчанан араастаһар буолан, туристар биир үксүн Камчаткаҕа, Сахалиҥҥа бараллар. Кэлиҥҥи сылларга сыаната чэпчэки буолан, оннооҕор Магадааны талаллар.

Түмэн-Эрилик Кырыарба аны сайын туристары кытта катамаранынан үрэх сүнньүнэн устарга быйыл эбии биир маннык тэрил атыыласта. Онон кини сайын устата “Хоротуга” базатын оҥосторун быыһыгар икки катамарынан сылдьарын тэһийбэккэ күүтэр.

Источник