Улуус салалтатын сүбэ мунньаҕар Үөһээ Бүлүүбүт социальнай-экономическэй сайдыытыгар, дьон олоҕо тупсарыгар, үлэ миэстэлэрин тэрийиигэ үлэлии сылдьар улууспут урбаанньыттарын Саха Өрөспүүбүлүкэтин урбаанньыттарын күнүнэн эҕэрдэлиир үөрүүлээх түгэн буолан ааста.
⠀
Аҕа баһылыкпыт Владимир Поскачин улуус чэлгийэ сайдыытыгар урбаанньыттар быһаччы кыттыыларын иһин истиҥ махталын тиэртэ. Быйыл сайын бүтүн Саха Сирин үрдүнэн айылҕаҕа улахан хорумньулаах кэм ааста. Бу иэдээҥҥэ урбаанньыттар туора туран хаалбаккалар, бэйэлэрин баҕа өттүлэринэн уоту кытары охсуһууга улахан төһүү күүс буолбуттарын үрдүктүк сыаналаан, махтанан туран, үрдүкү наҕараадалары туттартаата.
Ол курдук Ольга Дмитриевна Федорова аатынан Үөһээ Бүлүүтээҕи киин библиотека көҕүлээһининэн уоту кытары охсуһууга “Норуот күүһэ – көмүөл күүһэ”, Үөһээ Бүлүүтээҕи “Сааһын ситэ илик оҕону реабилитациялыыр киин” тэрийиитинэн “Соберем ребенка в школу” акцияларга бэйэлэрин сэмэй кылааттарын киллэрбиттэрин иһин “Үөһээ Бүлүү улууһа” муниципальнай оройуон баһылыгын бочуоттаах грамотатынан наҕараадаланнылар:
⠀
1. Николаев Александр Николаевич. ООО «Сахатутуугаз».
2. Антонов Александр Иванович, “Профото”.
3. Семенов Македон Петрович, “Автозапчасти” м-н.
4. Спиридонова Люция Петровна, “Бэллэкэ” м-н.
5. Михайлова Галина Константиновна, “Токко” м-н.
6. Александров Александр Андреевич, ООО “Алекс”.
7. Семенова Фаина Рафаэловна, “Вилюй” атыы-эргиэн киинэ.
8. Еттянова Марфа Васильевна, ООО “Баалыкай”, “Мааппа” м-н.
9. Осипова Сардана Андреевна, “Сардаана” м-н.
10. Степанова Раиса Егоровна, урбаанньыт.
11. Михайлов Юрий Николаевич, “Автозапчасти” м-н.
12. Михайлова Елена Прокопьевна,“Мила” м-н.
13. Сортолова Светлана Светлановна, урбаанньыт.
14. Егорова Куннэй Вадимовна, “Маитта” м-н.
15. Барчахов Семен Иванович, КФХ.
Маны сэргэ урбаанньыттары Саха Өрөспүүбүлүкэтин урбааҥҥа, эргиэҥҥэ уонна туризмҥа министрын солбуйааччыта Прокопьев Максим Михайлович куйаар ситимин нөҥүө холбонон эҕэрдэлээтэ. Саха Өрөспүүбүлүкэтин урбааҥҥа, эргиэҥҥэ уонна туризмҥа Министиэристибэтин Махтал суругунан Еттянов Николай Николаевич уонна Иванов Александр Иванович наҕараадаланнылар.
⠀
Урбаан – чахчы харса суох, хорсун санаалаах, булугас өйдөөх, иннин-кэннин ырыҥалаан, ааҕынар-суоттанар киһи ылсар дьыалата. Туруоруммут соругун ситээри урбаанньыт үбү-харчыны, активтары мунньунар, үлэһиттэри наймылаһан, үлэ миэстэтин таһаарар. Урбаан уопсастыба олоҕун айар-тутар, хамсатар төһүү күүһэ, судаарыстыба бөҕө тирэҕэ буолар.
Арыйбыт дьыалаҕыт сайдан-үүнэн истин,
Түбүктээх үлэҕит түмүктээх буоллун,
Сарсыҥҥы күҥҥэ эрэлгит улааттын!