Новости
Ураһалаахха куурусса, сибиинньэ, куруолук түҥэтилиннэ
26 июля 2018

Абый оройуонугар дьарыктаах буолуу сылыгар тыа хаһаайыстыбатын түргэнник ситэр салаатын нэһилиэнньэҕэ киэҥник тарҕатыыга балачча хамсааһын тахсыбыта бэлиэтэнэр. Тыа хаһаайыстыбатын управлениета бэлиэтииринэн, ордук көдьүүстээхтик «Ураһалаах» МТ дьаһалтата үлэлээтэ. Баһылык Владимир Новиков  тэрийиитинэн нэһилиэнньэҕэ сибиинньэ, куурусса, куруолук түҥэтилиннэ.

Абый улууһугар тыа хаһаайыстыбатын түргэнник ситэр салаатыгар нэһилиэк дьаһалталара хамыыһыйа тэрийэннэр, дьон баҕатын учуоттаан, анал испииһэк оҥорбуттара. Ким сибиинньэ, көтөр, куруолук ылыахтааҕа чуолкайдаммыта.

Ураһалаахха дьон-сэргэ көхтөөхтүк ылсан, мэктиэтигэр, куонкурус ыытылла сыспыта. Баһылык Владимир Новиков тута Абый нэһилиэгиттэн «Тирэх» СХПК-тан 20 сибиинньэ оҕотун ылан, аһылыктарын биэрэн испииһэккэ суруйтарбыттарга түҥэппитэ. Бу күннэргэ сибиинньэлэр ситэн-хотон боролуйдулар, сорохторо аны күһүн эмис идэһэ буолуохтара, атыттара кыстыахтара. Көтөр ииттэр да баҕалаахтар умнуллубатылар. Оройуон киинигэр Белай Гораҕа уруккуттан көтөрү иитиигэ илиитин чэрдээбит А.П. Мартынова көрөн-истэн таһаарбыт чоппуускаларыттан 120-ни ылан үлэтэ суохтары дьарыктаан үөрүүлэрин үрдэттэ. Билигин баһылык үгүстүк сүүрэн, олохтоохтук кэпсэтэн ураһалаахтарга 30 төбө куруолугу Дьокуускайтан аҕалтарда. Анал үс килиэккэнэн самолетунан кэлбиттэрэ, туруктара үчүгэй, үгүстэрэ икки ыйдаахтар, аһылыктара баар. Е.М. Старостина, Е.В. Горохова, Г.М. Яковлева, В.В. Степанова, А.Д. Садовникова уонна М.Н. Садовникова биэстиини ыллылар. Кинилэр этэллэринэн, сорох куруолугу кыстатыахтара, салгыы төрөтүөхтэрэ-ууһатыахтара.

Ураһалаах элбэх оҕолоох дьиэ кэргэнэ Саргылана Валерьевна уонна Роман Анатольевич Степановтар баһылык Владимир Новиков түргэнник ситэр салааҕа «хоннохтоохтук» ылсыбытын астына кэпсииллэр. Ыал эйэҕэс-элэккэй эбэтэ 74 саастаах Мария Христофоровна үүммүт күнү дуоһуйа көрсөр, олорон ылар бокуойа суох сылдьар: икки сибиинньэни, 15 кууруссаны аһатыахха наада. Ураһалаахтар түбүк-садьык оргуйар үөһүгэр сылдьаллара тыа хаһаайыстыбатын түргэнник ситэр салаата атаҕар бигэтик туруоҕар эрэл кыымын саҕар.

 

Ааптар: Афанасий ИВАНОВ

Есть вопрос?
Позвони 8-800-100-58-80