Новости
Урбаанньык Марфа Рожина маҕаьыына “Тотас”
18 сентября 2018

Биһиги улууспут киинигэр «Тотас» ма5аһыын улэлээбитэ номнуо үһүс сылыгар барда. Биир өттө ас маҕаһыына, аҥаара хаһаайыстыбаннай табаар атыыланар миэстэтэ буолар.

Маҕаһыын хаһаайкатыттан барытын сиһилии ыйыталаһыахха диэн Марфа Викторовна Рожинаны кытта кэпсэттим:

-2015 сылтан урбаанньыктар кэккэлэригэр киирбитим. Бастаан таҥас-сап аҕалан атыылаан саҕалаабытым, онтон 2016 сыл саҕаланыаҕыттан ас өттүнэн саҕалаабытым. Билигин саҥа үлэлээн эрэр буоламмын ымпыгын-чымпыгын улаханнык билбэппин, ол эрэн син үлэлээн истэххэ, үчүгэй курдук таах сытыахтааҕар. Бэйэм дьиҥинэн медик үөрэхтээхпин, 5 сыл оҕо уһуйааныгар үлэлээбитим, ол иннинэ оҕобун көрө олорбутум, онтон олох да медицина эйгэтиттэн барбытым.

Бастаан Малышевтар дьиэлэрин куортамнаан атыыбын туруорбутум. Онтон бу бэйэм маҕаһыын туттаммын дьэ туспа көстүм. Бу дьиэҕэ икки маҕаһыын баар: ас киэнэ уонна хаһаайыстыбаннай өттө. Тутарга үксүн бэйэбит дьоммут үлэлээбиттэрэ кэргэним, бырааттарым. Матырыйаалы барытын бэйэбит төлөөбүппүт, ороскуота улаханын улахан. Иһин-таһын барытын бэйэбит толкуйдаабыппыт, төһө кыалларынан үчүгэй оҥоро сатыыбын, дьиэбин эмиэ оннук оҥорбутум. Биллэн турар ынырык элбэх харчы барар, ол эрэн үчүгэй көстүүлээх, ыраас, сырдык буоллун диэммин. Инникитин улахан былаан суох, үлэлээбитим курдук үлэлээн иһиэм. Билиҥҥи туругунан күннээҕиннэн олоробун диэбит курдук. Сарсыҥҥы күнү улаханнык толкуйдаабаппын. Атыыбын бэйэм да баран ылабын уонна куораттан ыытар дьоннордоохпун.

Кыра-кыралаан сибиэһэйи аҕала сатыыбын, сыананы эмиэ наһаа ыарата сатаабаппын. «Быстрый оборот» диэни тутуһа сатыыбын, син үчүгэй курдук билиҥҥи туругунан. Кыһыҥҥы өттүгэр, массыына куортамнаан атыыгын ылларыаххын наада, бэйэбитигэр чааһынай улахан массыына суох буолан. Өссө саҥа дьыллааҕы массыына «золотой» диэн буолар, саамай сыаналаах. Бастакы уонна бүтэһик массыыналар оннук буолаллар, ол кэнниттэн суол үчүгэйдик арылыннаҕына массыына элбээтэҕинэ сыаната син удамыр буолар.

Бэйэм сылдьа сатаан бараммын син биир көмөлөһөөччү наада диэммин бэйэм күүспүнэн Ирина Михайловнаны ыҥыран ылбытым. Кини курдук саастаах, эрэллээх үчүгэй киһи наада.

Бастакы сылларгар биллэн туран ыарахан, ол эрэн миэхэ бэйэбэр тиийэр диэбит курдук. Билигин дьон сылдьара миэстэтиттэн наһаа тутулуктаах эбит дии санаатым. Холобур, бу иннинэ атыым барбат этэ, саамай сибиэһэй, чэпчэки сыанаҕа да атыылаатахпына. Билигин син барар. Дьон бастаан син биир ырааһын, үчүгэйин көрөр эбит, онтон дьэ атыыны көрөллөр. Таҥас өттүтүн сыыйа сабаары гынабын, тоҕо диэтэр икки өттүнэн үлэлиир ыарахан эбит.

Түмүкпэр этиэм этэ, саҥа дьылга табаар өттө олох атын буолуо, онон бастакы массыына кэллэҕинэ бары кэлиҥ, сылдьыҥ, атыылаһыҥ диэн.

                   

 

Эбээн Бытантай улууһугар предпринимателлэри өйуур киин бэрэстэбиитэлэ Ульяна Слепцова

Есть вопрос?
Позвони 8-800-100-58-80