Уус Алдаҥҥа улуус дьаһалтатын баһылыга Алексей Федотов ыыппыт мунньаҕар от үлэтигэр тэрээһин туругун дьүүллэстилэр. Аныгы кыстыкка сүөһү аһылыгын бэлэмнээһин боппуруоһа өссө муус устар ыйга көрүллэн, соруктар чопчуламмыттара.

Баһылык муус устар 20 күнүн 25 нүөмэрдээх дьаһалынан окко, ыһыыга уонна хомуур үлэтин сүрүннээһиҥҥэ сэттэ киһилээх оперативнай ыстаап тэриллибитэ.

От үлэтигэр былаан 37721 туоннанан быһыллан, коллективнай уонна бааһынай хаһаайыстыбаларынан, биирдиилээн кэтэх ыалларынан тыырыллан турар. Быйыл от үлэтигэр улуус үрдүнэн 1070 араас мааркалаах тиэхиньикэ, 716 звено, ол иһигэр 163 механизированнай, 283 полумеханизированнай, 268 дьиэ кэргэн биригээдэтигэр барыта 4570 киһи тахсара былааннанар. От сүмэһиннээх, иинэ-хата, иҥэ-сүтэ илигинэ туруннахха, быйылгы үүнүү таһымынан 37721 туонна дороххой аһылык былаана туолар кыахтаах. Тыа хаһаайыстыбатын управлениетын исписэлиистэрэ Өлтөх, Бэрт Ууһун, Лөгөй, Баатаҕай нэһилиэктэригэр ыыппыт бэрэбиэркэлэрин түмүгүнэн аһыҥа ааспыт сыллааҕар хойутаата. Тыаллаах кураан күннэри былыргы өбүгэлэрбит «аһыҥаны торолутар» диэн наһаа сэрэхэдийэллэрэ. Дүпсүн, Лөгөй, Өнөр, Суотту, I Өспөх нэһилиэктэрэ аһыҥа турар кутталлаах сирдэригэр тала сылдьан эмтээһини саҕалааһыннара атын хаһаайыстыбаларга тарҕаныан наада. Исписэлиистэр алаас сирдээх Лөгөйгө, Баатаҕайга, үрэх эҥэрдээх Байаҕантайга ыыппыт бэрэбиэркэлэринэн от үүнүүтүн туруга ааспыт сыллааҕар лаппа ордук.

Былырыын курааҥҥа оҕустаран, былаан туолбакка, 2644 туонна оту атыылаһан, кыһалҕалаах кыстыгы туораабыппыт. Ол улуус хаһаайыстыбатыгар улахан охсууну таһаарбытынан, быйыл былааны таһынан от саппааһын бэлэмниир уон мобильнай биригээдэни тэрийэр соругу туруордулар.

Ааптар: Алексей ТРОЕВ