Бу сыл сэтинньи 26-30 күннэригэр  Россия сурэҕэр Москва куоракка «Молодой предприниматель России-2017» диэн российскай конкурс ыытыллыбыта,  уопсайа 63 регионтан кыттыыны ылбыттара. Саха сириттэн «Работодатель года» диэн номинацияҕа проект «Дархан» Сунтаар урбаанньыга Денис Павлов 3 миэстэ буолбута уонна  «Производство года» номинацияҕа тус наҕараада  «За бизнес в тяжелых условиях» диэҥҥэ Гаврил Троев тиксибитэ.

Билэргит курдук от ыйын 30 күнүгэр республикатааҕы  «Молодой предприниматель-2017» диэн конкурс ааспыта. Уопсайа 54 заявка киирбититтэн 14 урбаанньык финалга тахсыбыта. Конкурс Хаҥалас улууhугар  «Орто Дойду» комплекска ааспыта. Эдэр бизнесменнар жюри иннигэр презентацияларын көмускээбиттэрэ. Жюри финансовай показателын эрэ буолбакка, проект төhө конкурентоспособнайын, олоххо социальнай наадатын, туох санаалааҕын эмиэ көрөн дьүуүллээбитэ.

«Производство года» номинацияҕа бастакы миэстэни Уус-Алдан Хоро нэhилиэгин урбаанньыга Гаврил Троев ылбыта. «Открытие года» номинацияҕа бастаабыта куораттан сылдьар Валентина Степанова тыҥырах оноруу проегынан. «Социальный бизнес» номинация кыайыылааҕа куорат олохтооҕо  Анжелика Джуалова «Оҕо сайдар киинэ»  диэн проега буолбута. «Работодатель года» номинация кыайыылааҕа Сунтаар урбаанньыга Денис Павлов  буолбута. Ол курдук бастаабыт урбаанньыктар Россия таhымыгар күрэххэ бараллара быhаарыллыбыта.

«За бизнес в тяжелых условиях» диэн номинация Гаврил Троевка иҥэриллибитэ.

Эдэр урбаанньык үлэтин 2016 сылтан  килиэп оҥорооhунан саҕалаабыта. Улуустан саҥа саҕалыыр урбаанньыктарга субсидиянан туhаммыта. Гаврил Майаҕас нэhилиэгэр пекарнялаах уонна эбии 15 нэhилиэккэ килиэби тиксэрэр.         

— Гаврил, эн санааҕар төhө ыарахан эбитий Россия таhымнаах конкурсугар кыттар?                                                  

— Бастаан санаабар олус ыарахан курдук дии санаабытым. Российскай таhымҥа баран кыттарга манна Саха сиригэр буолбут конкурска кыттыбыппыт опыт эппитэ дии саныыбын. Российскай конкурска барарбытыгар бизнес-школа туhааннаах үлэhиттэрэ ыйан-кэрдэн, барытын чопчу быhааран үөрэтэн ыыппыттара.Саха Республикатын Инвестиционнай сайдыыга уонна урбааҥҥа министиэрстибэтэ  көмөтүнэн билеппыт, олорор сирбит барыта толору төлөммүтэ. Онон махтаныах эрэ тустаахпыт биhиэхэ маннык үчүгэй усулуобуйа оҥорон тэрийэн ыыппыттарыгар. Атын да регионнары кытары тэҥнээтэххэ Саха Сириттэн бэлэмнээх тиийбиппит көстөр этэ.

— Туох саҥаны билэн кэллиҥ?

— Саҥаны билбитим-көрбүтүм элбэх. Аҥардас Москва куоракка сылдьан кэлбиппиттэн астынным. Саамай наадалаҕа диэн атын регионнар хайдах үлэлии олороллорун билээhин, опыт атыстаhыыта, аҕыйах күн иhигэр доҕордоhуу, сүрдээх эмоциональнай эйгэ, бары кыттааччылар аhаҕастык кэпсэтэллэр, үөрэ-көтө сылдьаллар. Телефоннарбыт номердарын атыстаспыппыт, салгыы да сибээспитин тутуохпут.

— Атын регион кыттааччылара хайдах эбиттэрий?

— Бастатан туран саҥалара-иҥэлэрэ олус үчүгэй, дьон иннигэр кытталлара уонна презентацияларын көмүскэллэрэ үчүгэй. Үксэ пиццерия, франшиза өттун сайыннарбыттар эбит.

-Эдэр урбаанньыктарга бу конкурс туhунан тугу тириэрдиэн этэй?

— Эдэр урбаанньыктар маннык конкурстарга дэлби кыттан иhин, бэйэҕит сайдаргытыгар олус туhалаах. Билигин государство өттүттэн сүрдээх элбэх көмө баар, финансовай эрэ буолбакка, босхо үөрэтии өттунэн араас семинардар, трениннэр, курстар бааллар.    

Уус-Алдан улууhугар Саха Республикатын урбаанньыктарын өйүүр киин  сэбиэдиссэйэ Елена Кычкина.