×

Следите за новостями в Telegram-канале Центра «Мой бизнес» Якутии

Читать
Новости
Вера Лиханова: “Бэйэбит аспытын-үөлбүтүн таһаарарга тоҕоостоох кэм”
17 марта 2022

Бүгүн Саха сирин бааһынай хаһаайыстыбаларын (пиэрмэрдэр)  уонна тыа хаһаайыстыбатын кэпэрэтииптэрин ассоциациятын отчуоттуур-быыбардыыр кэмпириэнсийэтэ буолан ааста. Түгэнинэн туһанан бааһынай хаһаайыстыбаларын салайааччыларын санааларын иһиттибит.

Вера Петровна Лиханова, Горнай улууһун Одуну нэһилиэгин олохтооҕо, бааһынай хаһаайыстыба салайааччыта:

— Бүгүн инники олохпут хайдах буолуохтааҕын, хайдах дьаһанан олорор-үлэлиир туһунан толкуйдуур кэммит кэллэ. Мин айылҕаҕа үүнэр отону хомуйан, онтон бородууксуйа оҥорон таһаарыынан кыра да буоллар дьарыктанабын. Уопсайынан ыллахха, өрөспүүбүлүкэбитигэр соҕотуопканы өйүүр ньымалары тобулар туһалаах буолуо этэ. Тыа сиригэр хайа баҕарар ыал отон хомуйар, эмтээх оттору хомуйуунан дьарыктанар. Табылыакка эмп оҥоһулла илигинэ эми айылҕаттан ыла олордохторо дии урут. Пастила диэни оҥоробун. Туох да улахан тэрилим суох, дьиэтээҕи 3 тэрили (оборудование) туһанабын. Бу бородууксуйам диэххэ дуу – пастила кэмпиэт курдук, ол эрээри саахара суох оҥоһуллар. Саахары куттуҥ да дьиҥнээх туһалаах свойстволара сүтэллэр дии саныыбын. Аны туран холодильникка уурарга наадыйбат ас буолар. Быһата, 97 бырыһыаҥҥа диэри иҥэмтэлээх веществотун сүтэрбэт. Айылҕа быйаҥыттан оҥорон таһаарар бородууксуйабын атыылата “Көмүлүөккэ” туттарааччыбын. Араас дьаарбаҥкаларга кытыннахпына амсайан көрөн баран, эргиэн ситимнэрэ ылаары ымсыыраллар. Кинилэргэ улахан кээмэйдээх бородууксуйа наада буоллаҕа. Пастилабын  Москваҕа тиийэ ыытааччыбын. Ол иһин бу дьарыгым кэҥиэн баҕарабын.

2017 сыллаахха  “Саҥа саҕалыыр пиэрмэр” гранын ыларга сылгынан дьарыктаныахпын баҕарабын диэн бырайыакпын көмүскээбитим. Кэргэмминиин, улахан уолбунуун, эһээбитин кытта бу хайысхаҕа ылыстыбыт. Ааспыт сайын ойуур уота турбутун бары билэҕит. Ол да буоллар, син кыл мүччү сыл тахсар оттоохпут, сылгыларбытыгар эбиэс биэрэбит. Уонна баһаар кэнниттэн күһүн кэнчээрилээбит этэ, сылгыларбыт ону хаһан аһыыллар.

Урут Сэбиэскэй кэмҥэ эбээлэрбит, эһээлэрбит сойууһу, дьону-сэргэни хааччыйан олордохторо дии. Бэйэбит бородууксуйабытын, дьиҥнээх аспытын таһаарарга тоҕоостоох кэм үүннэ.  Онон сыана ыараабытыттан иҥнибэккэ, киһи оҥорорун оҥорон, таһаарарын таһаарыах тустаах. Бааһынай хаһаайыстыбалаах дьон биисинэс курдук толкуйдаан үлэлиэхтээхпит, оннук дьаһанар кэм кэллэ. 

Источник