«Мин биисинэһим» Амматааҕы киинин салайааччыта Владимир Колосов атыы-эргиэн эйгэтигэр билигин үөскээбит балаһыанньа туһунан санаатын үллэстэр.
Урбаан, биисинэс эйгэтэ бастаан пандемия кэмигэр хааччахтааһыннартан күүскэ оҕустарбыта. Онтон билиҥҥи балаһыанньа аны үөйбэтэх өттүбүтүттэн холорук курдук атыйахтыы ытыйда. Оттон буурҕа, күүстээх ардах кэнниттэн күн көрөр, нуһараҥ буолааччы. Ол сиэринэн олохпут оннугар түһүө, тупсуо диэн эрэнэбит. Тоҕо диэтэххэ, урбаанньыт диэн – үөскээбит усулуобуйаҕа түргэнник үөрэнэ, быыс-хайаҕас була охсор, өйө-санаата түргэнник тобуларынан уратылаах киһи. Тас дойдулары кытта атыы-эргиэн бастаан эрэ бытаарбыт курдук буолуо эрээри урбаанньыттар атын хааччыйааччыны булан ити итэҕэһи түргэнник туоратыахтара. Оттон олохтоох оҥорон таһаарыы күүскэ сайдар, атаҕар турар кэмэ дьэ кэллэ. Сэбиэскэй кэм курдук аспытын-таҥаспытын бэйэбит оҥорон таһаарарбыт элбиэҕэ. Хата, бэйэ бородууксуйата доруобуйаҕа туһата үгүс буолуо. ГМО-нан толору киирии астар атыыттан сүттэхтэринэ ыарыы даҕаны аҕыйыа. Онон сүүйтэриэхтээҕэр сүүйэрбит буолуо диэн сэрэйэбин. Онон илиҥҥи дойдулар хааччахтааһыннары киллэрбиттэрэ эмиэ икки өрүттээх буолан тахсар.
Ас-таҥас, бородуукта сыаната өрө барбыта ыраас спекуляция диэн этиэххэ наада. Сахалыы толкуйдаан да көрдөххө, бэйэбит бурдукпут, сахарбыт — ханна да сүппэт, наар баар. Маннык балаһыанньаттан улахан оҥорон таһаарааччылар харчы “өлөрөн” хаалаары нууччалыы эттэххэ, искусственнай дефицит оҥордулар. Өйдүүргүт буолуо, бастаан пандемия саҕаламмытыгар эмиэ итинник быһыы-майгы үөскүү сылдьыбыта, дьон ыксалынан маҕаһыын долбуурдарыттан курууппаны суох гыммыттара. Онтубут ханна барыай? Саппаас өрүү баар, харгыһа суох кэлэ турар. Билигин эмиэ оннук көстүү хатыланна. Онон наһаа айманар, былдьасыһа-былдьасыһа хаһаанар наадата суох дии саныыбын. Бэйэбит аймалҕан долгунугар олорсон харса-хабыра суох атыылаһарбытын тохтоттохпутуна сыана сотору оннугар түһүө дии саныыбын.
Олохтоох урбаанньыттар, табаары таһан атыылааччылар сыананы төһө кыалларынан тута сатыыллар, кууһунан атыыласпыт сыаналарыгар бэрт кыра, айан ороскуотун эрэ сабар гына эбэллэрин, хааччыйааччыттан улаханнык тутулуктаналларын этэллэр. Урут инстаргам нөҥүө үлэлии олорбут урбаанньыттар атын платформаҕа көһөн биэрэллэр, онон ити өттүгэр улаханнык сүүйтэрбэттэр. Телергамҥа билигин реклама, биллэрии хото кэлэр, атыы-эргиэн харгыһа суох иннин диэки дьүккүйэр.
Түгэнинэн туһанан Амма улууһун урбаанньыттарыгар сыананы аһары үрдэппэккэ, бэйэлэригэр улахан барыһа суох да буоллар, тута сатыылларыгар улахан махталбын этихпин баҕарабын. Сотору кэминэн барыта этэҥҥэ буолуоҕа диэн эрэнэбин.
Дойдуга баар балаһыанньа туһунан кырдьыктаах сонуннары объясняем.рф сайтка киирэн ааҕын.