“Дойду Президенэ Федеральнай Мунньахха Анал этиитэ коронавирус дьаҥа күннээҕи олохпутугар киллэрбит уларыйыылара нэһилиэнньэҕэ мөкү өттүнэн сабыдыаллыырын төһө кыалларынар аччатарга туһуланна.  Мин урбаан эйгэтин үлэһитэ буоларым быһыытынан, манна көрүллэр өйөбүллэр дьоҕус уонна орто биисинэс охсууну ыларын харгыстаһыа диэн бэркэ сэргии иһиттим. Ол курдук, былырыын урбаанньыттарга нолуокка, социальнай төлөбүрдэргэ сымнатыы оннунан хаалар буолла. Страховой усунуос 30%-тан 15 % диэри түспүтэ, бу өйөбүл салгыы үлэлиирин эттэ. Аны туризмы сайыннарыыга 3-5 % чэпчэтиилээх кредит көрүллүө диэн бэрт этиини киллэрдэ. Маны таһынан Россия иһигэр сынньаммыт дьон агентствоҕа төлөөбүт ороскуотун 20%-нын төннөрүү бырагыраамата салгыы  үлэлиэхтээх. Бу бырагыраама, биллэн туран, туризм сайдыытыгар төһүү күүс буолара саарбахтаммат. Билигин Амма улууһун Федеральнай туристическай кластерга киллэрэргэ улуус өттүттэн күүстээх үлэ бара турар. Онон инникитин Аммаҕа туризм сайдыытыгар бу Этии көмөлөөх буолуо диэн эрэнэбин. Бырабыыталыстыбаҕа урбаанньыттарга көмө оҥорор механизмнары биир ый иһинэн толкуйдаан киллэрэллэригэр сорудахтаата. Онон  бэрт сотору кэминэн улахан хамсааһын тахсыа диэн күүтэбит”.

Источник: Улус Медиа