Уолбут кыра нэһилиэк. Нэһилиэнньэтин ахсаана 187. Хаһаайыстыбанан аахтахха 67. Манна ыал үксэ саас аайы хортуоппуй олордон, кыстыылларын бэйэлэрэ булуналлар. «Оҕуруот аһын үүннэрэргэ буорбут ордук табыгастаах”, — дииллэр олохтоохтор. Сатабыллаах хаһаайкалар теплицаҕа, коробтарга атын да оҕуруот аһын олордон, сибиэһэйдии сииллэр, кэнсиэрбэлээн хаһааналлар, тиэргэннэрин араас сибэккинэн симииллэр. Бэйэлэрин таһынан Белай Гораҕа олорор оҕолорун, сиэннэрин хаачыйаллар, ордорун бэрсэллэр, сорохтор атыылаан эбии дохуот оҥостоллор.
Юрий Попов дьиэ кэргэнэ иккис сылын хортуоппуйу үүннэриинэн дьарыктанар. Маҥнайгы сылыгар оттуур ходуһа аттыгар 1 га сир ылан, улуус хааччыйбыт техникатынан сирин оҥостубут. Ол сыл 8 туонна хортуоппуйу олордон, 2 эрэ туоннаны ылбыт. Онтон иккис сылыгар эмиэ 4 туонна курдугу олордон, эмиэ табыллыбатах. 2 туонна олус кыра (мелкай) хортуоппуйу хомуйбут. Эрдэ, сайын ортото, хаһыҥ түһэн, тоҥон хаалбыттар. Хоту дойду тыйыс усулуобуйата оннук буоллаҕа.
Манан Юрий тохтоон хаалбатах. Былырыын эргэ хотон турбут миэстэтигэр илиинэн сир оҥостон, 300 киилэ хортуоппуйу олордубут. Бу сырыыга табыллан, 2 туоннаны ылбыт. Белай Гораҕа атыыга ыыппыт. Буор Үрэххэ диэри Беларусь тракторынан, онтон лодканан улуус дьаһалтата көрсөн ылбыт. Сибиэһэй бэйэ сиригэр үүннэриллибит хортуоппуй киилэтэ 130 солк. дөбөҥнүк атыыга барбыт.
Юрий ылсыбыт дьарыгын салгыыр былааннаах. Сыл аайы уопутуран, тугу сыыспытын, хайдах гыннахха үүнүүтэ үрдүөҕүн үөрэтэн, быйыл ыһыытыгар эрдэттэн бэлэмнэммит. “Бэйэбит үүннэрбит хортуоппуйбутуттан сиэмэҕэ хаалларыммыппыт. Сирбитин
улаатыннарбаппыт. Боруобаланан көрөбүт. Сайыммыт сыл аайы биир буолбат. Былырыын үүнээйигэ үчүгэй сайын ааспыта. Бириэмэтигэр ардыыр, куйаас, үчүгэй сайын этэ. Биһиэхэ, хоту, от-мас, үүнээйи үүнүүтэ дьылтан ордук тутулуктаах. Сирбитин быйыл эмиэ илиинэн оҥостуохпут. Техника сири наһаа дириҥник хорутар, ол иһин биһиги кылгас сайыммытыгар ситэн үүммэт. Быйыл уу ситимэ саҥардыллыахтаах. Ол киирдэҕинэ оҕуруоччуттарга төһүү күүс буолуо этэ”, — диэн Юрий санааатын үллэстэр.
Поповтар үлэһит ыал. Үс оҕолоохтор. Юрий Мэҥэ Хаҥалас. Уолбуттарга күтүөт. Манна кэлэн олохсуйбуттара уонча сыл буолла. Бастаан индивидуальнай предприниматель быһыытынан техниканан дьоҥҥо өҥө оҥороро. Онтон сылтан сыл дьыалатын кыралаан кэҥэтэн иһэр.
Былырыыҥҥаттан сылгы иитиитинэн дьарыктанан саҕалаабыт.
Ити курдук, тыа дьоно олорон хаалбакка, бюджеттан эрэ хамнастанан киһи үлэлээх буолар диэн өйдөбүлтэн тахсан, суолларын тобулан, олохторун уйгутун бэйэлэрэ оҥостоллор.