Ытык Күөлгэ сэтинньи 1 күнүгэр «Ионова оскуолата» общественнай тэрилтэ иһинэн  «Сайкл» диэн хайысхалаах дьахталларга аналлаах саҥа фитнес-студия аһылынна.  Бу тэрилтэ социальнай хайысхалаах коммерческайа суох тэрилтэлэргэ СӨ ыччат дьыалаларыгар уонна дьиэ кэргэн политикатыгар субсидиянан үбүлэнэр граны ыларга ыытыллыбыт куонкуруска кыайыылаах буолбута. Гранынан оҕо площадкатын уонна дьахталларга фитнес-оборудование ылбыттара.

Студияны Екатерина Семенова салайар. 4 хайысханан анал тренердэр эти-хааны эрчийиигэ үлэлиэхтэрэ. Студия аһыллыытын «Таатта нэһилиэгэ» МТ баһылыга Е.И.Павлов тус бэйэтинэн, «Сарыал» КСК дириэктэрэ өйөөтүлэр.

— Ионова оскуолата 4 сыллааҕыта тэриллибитэ. Ити кэм устатыгар бу оскуола дьоҥҥо олус наадалааҕын, аныгылыы тэрээһиннээҕин көрдөрбүтэ.  Нэһилиэнньэҕэ араас культурнай-сынньалаҥ өҥөлөрүн тэрийэн кэлбиттэрэ. Ионова оскуолатыгар үҥкүүгэ, уруһуйга, английскай тылга, чэбдигирдиигэ, оҕону сайыннарыыга дьарыктар ыытыллыбыттара. Саҥа хайысхалаах хамсааһыннар олоххо тардыһыыга, чэгиэн буолууга саҥа суолу аһаллар.
Алтынньы 22 күнүгэр элбэх оҕолоох эдэр ийэлэргэ, дьиэ кэргэттэргэ маастар-кылаастар, көмө консультациялар ыытыллыбыттара. Маннык инникигэ эрэллээх дьон баар буоланнар олоххо тардыһыы күүһүрэр аналлаах. Онон бу фитнес-студия музыка дьүрүлгэнин тэтимигэр сөп түбэһиннэрэн хамсаныы, дьарыктаныы инникитин сайыннын, чэгиэн буолууга күүс уктун, — диэн бэлиэтиир М.МОСОРКИНА, улуустааҕы предпринимателлэри өйүүр киин салайааччыта.

Источник: Улуус медиа